د بین الافغاني خبرو لپاره ځېنې ستونزې سر له اوسه محسوسیږي .
بین الافغاني خبرې د امریکا سره تر هوکړې وروسته د لسو ورځو په موده کې پیلیږي، خو د طالبانو د بندیانو د ازادیدو شرط او د پلاوي په برخه کې موجوده ستونزې دا اټکل زیات یقیني کوي چې بین الافغاني خبرې به په ځنډ سره پیل شي.
افغان حکومت له لوري د پلاوي په جوړښت کار روان دی او ممکن ځېنې تغیرات په کې رامنځته شي خو وضاحت نه ورکوي.
د ولسمشر ویاند صدیق صدیقي داسې وویل (( طالبانو سره د حکومت مذاکره کوونکی ټیم به د افغانستان د خلکو استازولي وکړي، په خورا زیات دقت او مسوولیت به پرمخ ځي. د پلاوي د صلاحیتونو او مسوولیتونو په باب اوسمهال مشورې روانې دي.))
د ملي امنیت شورا سلاکار محمد حنیف اتمر وايي، د پلاوي جوړښت باید ژر او په دقت سره وشي او د تخریب لپاره باید هیچا ته موقع ورنکړل شي.
افغان حکومت د بندیانو د ازادیدو لپاره مهم مسولیت هم په غاړه لري چې بین الافغاني خبرو ته لار هواره کړي، خو ارګ تر اوسه د پنځه زره طالب بندیانو په اړه څه نه وايي.
له دې سره طالبان وايي، د بندیانو خلاصون له امریکا سره په لاسلیک کېدونکې مسوده کې شامل دي.
ملګري ملتونه چې د روانې پروسې مهم ادرس بلل کیږي ټینګار لري چې له فرصت دې ګټه پورته شي او د فرصت ضایع کوونکي به څوک ونه وبښي.
د ملګرو ملتونو عمومي منشي انتونیو ګوتریس داسې ویلي (( د افغانستان د سولې لپاره غوره او مهم فرصت رامنځ ته شوی، دا فرصت باید ضایع نشي. که د سولې رامنځ ته شوی فرصت ضایع شو، نو هېڅوک به د فرصت ضایع کوونکي و نه بښي. پر پاکستان هم غږ کوو چې د افغان سولې لپاره حقیقي همکاري وکړي او افغانان باید له روان خونړي وضعیت څخه بهر شي.))
د بین الافغاني خبرو لپاره تر اوسه ځای هم نه دی کره شوی، خو جرمني او ناروې یې د کوربتوب ژمنه کړې خو ډېر احتمال شته چې لومړنۍ ناسته به ناورې هېواد کې وشي.
