د بهرنیو چارو وزارت د ریاست الوزرا د حکم پر اساس، د ایران په مشهد ښار کې د افغانستان کونسل عبدالجابر انصار د پنځه کلن ماموریت د پای ته رسېدو او هېواد ته یې د رابللو خبر ورکړی.
په دې تړاو په خپره شوې اعلامیه کې راغلي، له دې وروسته د نوموړي لاسلیک او نښان د اعتبار وړ نه دی چې له کبله یې ټول امتیازات پای ته رسېږي او نور نه شي کولی، په کوربه هېواد کې له ډېپلوماټیکو امتیازاتو او مصونیت برخمن شي.
په اعلامیه کې دغه راز ذکر شوي، نوموړي د غبرګولي (جوزا) پر ۶ مه د خپلې کاري مودې له پای ته رسېدو وروسته په غیرشفاف ډول د استازولۍ د عوایدو پر راټولو لاس پورې کړی او په اداري چارو کې د غیرمسوولانه لاسوهنې سره یې غیر قانوني کړنه ترسره کړې.
د بهرنیو چارو وزارت مرستیال ویاند احمد ضیا تکل وايي: « لکه څنګه چې انصار د خپلې دندې له پای ته رسېدو وروسته په غیرشفاف ډول د استازوالۍ د عوایدو په راټولو او اداري چارو کې د غیر مسوولانه لاسوهنې په څېرغیر قانوني کړنې ترسره کولو سره د سوداګرو، مراجعینو او سیمه کې د مېشتو افغانانو لپاره د کونسلګرۍ د خدمتونو وړاندې کولو بهیر اغېزمن کړی؛ نو له همدې امله د انصاري لاسلیک او نښه د اعتبار وړ نه ده.»
اعلامیه کاږي، د نوموړي له دې کار سره د مراجعینو، سوداګرو او هلته د مېشتو افغان کډوالو ته د وړاندې کېدونکو کونسلي خدمتونو بهیر اغېزمن شوی.
له همدې کبله د نوي کونسل تر ګومارنې، هغه ته د مسوولیتونو ترسپارلو او مراجعینو ته پر وخت د خدمتونو په وړاندې کولو کې د ځنډ مخنیوي لپاره، به د استازولۍ یو بل ډېپلوماټ کونسلي چارې پر مخ بیايي.
د سیاسي چارو شنونکی جنت فهیم چکري وايي: « د مشهد جنرل کونسل د کار پای او اسلامي امارت یې د کار له پای وروسته کړنې څېړي او په پنځه کلونو کړنو کې یې د فساد او روڼتیا نشتوالی وړاندې کوي او په پایله کې به یې هغه کارونه چې د افغانستان د اتباعو لپاره یې په کوربه هېواد کې ترسره کړي ټول باطل شي.»
اعلامیې کې د ډېپلوماټیکو او کونسلي چارو په اړه د ویانا کنوانسیونونو له مخې، د ډېپلوماټیکو استازو د دندې پای ته رسول او راګرځول د استوونکي هېواد له واکونو او په نړیوال عرف کې یوه عادي چاره بلل شوې.
خو د سرپرست حکومت دې پرېکړې د یو شمېر ایراني رسنیو تند غبرګونونه راپارولي او د ایراني لوري له موافقې پرته د افغان لوري دغه کړنه یې یو اړخیزه او بې احترامي بللې.
د سیاسي چارو شنونکی عزیز معارج وايي: « د نړیوالو ډيپلوماټيکو اصولو پر بنسټ چې ویانا او شیکاګو کانفرانس کې د ۱۹۶۰ یا ۱۹۶۳ کال کې ترسره شوي؛ خو طبعاً رئیس نمایندګي سفیر چې ځي هغه ته هوکړه لیک لېږل کېږي بل هوکړه لیک چې راشي هغه اعتماد نامه وړي په خاص پرتوکول په ډيپلوماټيکه تشریفات یې د هېواد لومړي کس ته تسلیموي او همداسې چې جنرل کونسل هم چې ټاکل کېږي هغه د بهرنیو چارو وزارت تشریفاتو رئیس ته تسلېمېږي او کله چې د دوی دنده پای ته رسېږي؛ نو ورته مراسم لري، یو تودیعی ملاقات کوي او مارمویت یې پوره کېږي، د مقیم هېواد د بهرینو چارو وزیر خبروي او بېرته راوځي او راځي خپل هېواد ته.»
دا په داسې حال کې ده، چې د ویانا کنوانسیون د دویمې او لسمې مادې له مخې، هېوادونو ته په دایمي ډول د ډېپلوماټیکو ماموریتونو د استولو او برعکس د هغه د عزل پرېکړه باید د ډېپلوماټیکې دستګاه په توګه د مقابل لوري د بهرنیو چارو وزارت له موافقې وروسته ترسره شي.
