د مزارشریف ښار څخه تر شادیان صنعتي پارک پورې د ۴۰ میلیون افغانیو په ارزښت رغول شوی سړک په داسې حال کې ګټه اخيستنې ته سپارل کېږي چې پخوا یې له امله صنعتکاران له زیاتو ستونزو سره مخ وو. د مزار شريف ښاروالۍ مسولین وایي، راتلوونکی کال به په دې ښار کې ۲۰ نورې پراختیایي پروژې هم پیل کړي.
د مزار شريف ښاروالۍ سکټوري رییس احمد جاوېد مایار وايي: « د دې سړک اوږدوالی یو نیم کیلومټره دی او که دوه طرفه یې حساب کړو نو درې کیلومټره دی چې ۷ متره سور لري. همدارنګه د سړک دواړو غاړو ته لښتي او په منځ کې یې ګلدان هم جوړ شوي دي. د دې سړک بودیجه شاوخوا ۴۰ میلیونه افغانۍ وه چې د ښاروالۍ له خپلې بودیجې ورکړل شوه.»
یو شمېر صنعتکاران د دې اقدام هرکلی کوي او وایي، له دې وړاندې د خرابې لارې له امله د تولیدي کارخونو فعالیتونه ټکني وو، خو اوس هيله شته چې ستونزې به يې حل شي.
د بلخ صنایعو او کانونو خونې رییس امام الدین سنایي زاده وايي: « دا سړک دومره خراب و چې د موټر په وسیله تګ راتګ هم پرې سخت و. زموږ هغه فابریکه لرونکي چې په دې صنعتي پارک کې خوراکي توکي تولیدوي، تر ښاره یې د دغو توکو په لېږدولو کې ضایعات لرل. حتا په ځینو حالاتو کې د ډېر جمپونو له امله تر۳۰ سلنو ضایع کېدل.»
مزار شریف یو له لویو او سترو صنعتي ښارونو دی چې دا مهال په کې تر زرو زیاتې لویې او کوچنۍ تولیدي کارخونې شته دي. ځایي چارواکي ډاډ ورکوي چې له صنعتکارانو ملاتړ کوي او ورته نورې پروژې به هم تطبیق کړي.
د بلخ مرستیال والي نورالهادي ابو ادریس وايي: « راتلوونکو څو کالو کې به د مزار شریف ښار بڼه بدله شي. زه تاسو ته ډاډ درکوم چې د اسلامي امارت حکومت د خلکو په خدمت کې دی او موږ باید د هېواد په جوړولو کې ورسره ونډه واخلو.»
دا په داسې حال کې ده چې امیرعلي شېرنوایي صنعتي پارک ته غځېدلی سړک هم له کالونو راهیسې ویجاړ پورته دی. صنعتګر د دې سړک په رغولو کې هم له حکومت د پاملرنې غوښتنه کوي.
