د افغانستان اسلامي امارت ویاند ذبیح الله مجاهد وايي،چین په افغانستان کې د پروژو په پلې کولو کې لومړی ګام پورته کړ او د رسمیت پېژندلو برخه کې دې هم دا امتیاز خپل کړي.
مجاهد وايي، د چین په ګډون ټولو هېوادونو ته ډاډ ورکوي،چې افغان خاوره د چا خلاف نه کارول کېږي او د چا په کورنیو چارو کې به لاسوهنه نه کوي، خو له نورو هم ورته تقاضاء لري.
مجاهد زیاته کړه:« افغانستان اوس مهال پر رسمیت پېژندلو ته اړتیا لري او زموږ غوښتنه بیا له نړیوالو څخه په ځانګړې توګه ګاونډي هېواد چین څخه دا ده،چې اسلامي امارت دې د یو مشروع حکومت په توګه پر رسمیت وپېژني. دا یو ښه ګام دی او کېدای شي،وروستي ګامونه تر دې هم ګټور تمام شي.»
د عدلیې وزارت چارسمبالی وزیر شیخ عبدالحکیم شرعي وايي:« نو زه دا وایم،چې دا دویم قدم هم واخله،چې دا به تاریخ چېرته هېر نه کړي،چې چین هغه هېواد دی،چې افغانستان او اسلامي امارت یې په لومړي ځل پر رسمیت وپېژانده.»
مجاهد د نورو هېوادونو سربېره له چینایي پانګوالو هم وغوښتل،چې افغانستان کې پانګونه وکړي او دوی به ورته ډاډمنه فضاء برابره کړي.
مجاهد زیاته کړه، ډېر ژر به د مس عینک پروژه له سره پیل شي،چې له چین تر لوګره به ریل پټلۍ جوړه شي، له بامیانو څخه به برېښنا را انتقال شي او د مس تصفیه به هم افغانستان کې کېږي.
مجاهد وايي:« له دې پروژې به ۶ اعشاریه ۸ ملیارډه متر مکعب خالص مس چین ته انتقال شي او بیه به یې هم پر نړیوال معیار برابره وي.»
چین په عدلیې وزارت کې د یو جومات او دوه عدده د اوبو څاګانو پروژه پلې کړه.
عدليې وزارت چارسبمالي وزیر عبدالحکیم شرعي نړۍ ته پیغام ورکړ،چې هېڅکله به ورسره په خپله عقیده او خاوره معامله ونه کړي.
شرعي وايي، له افغانستان پرته نورو هېوادونو کې زندانونه په سیاسي بندیانو ډک دي،خو اسلامي امارت ټولو پخوانیو مسلکي او غیر فاسد اشخاصو ته بېرته دنده ورکړه.
شرعي زیاته کړه:« هېڅوک دې دا تصور نه کوي،چې زه به د خپل شرعي نظام څخه یو قرم هم شاته شم. د دې لپاره ما قربانۍ ورکړي دي او ماته شریعت دا اجازه نه راکوي،چې د هلکانو او نجونو تعلیم دې مخلوط وي او ګډ وي،دا ماته شریعت اجازه نه راکوي.»
چین وایي،افغانستان سره د اړیکو پیاوړتیا او پراختیا غواړي او هڅه کوي،چې د افغانستان اقتصاد وغوړېږي.
کابل کې د چین سفیر وانګ یو وایي، حکومت یې له امریکا او نړیوالې ټولنې وغوښتل،چې د افغانستان کنګل کړې شتمني ازاده کړي او له فشارونو تیر شي.
هغه وايي، د چین او افغانستان ترمنځ د سوداګرۍ پراختیا ته هم ژمن دي.
یوو زیاتوي:« نن د جومات او څاه ګانو جوړولو د بنسټ ډبره ږدو،چې د چین او افغانستان ترمنځ د دوستۍ نښه به وي. اوس مهال افغانستان د خپلواکۍ اخېستلو بهیر کې قرار لري او چین د افغانستان د اقتصادي پیاوړتیا لپاره هڅې او ملاتړ کوي.»
اسلامي امارت وایي، د نړۍ منل شوي قوانین مني،خو د اسلامي شریعت خلاف د چا فشار ته نه تسليم کېږی او یو ګام هم شاته نه ځي.
