له تېرو درېیو کلونو راهیسې کابل له تهران سره په اقتصادي، سیاسي او امنیتي برخو کې ښې اړیکې لري او په یاده موده کې سرپرست حکومت د سیمې او نړۍ له هېوادونو په کراتو کراتو غوښتي، چې د رسمیت پېژندلو شرطونه يې پوره کړي او اوسنی حکومت دې پر رسمیت وپېژني.
د اسلامي امارت وياند ذبیح الله مجاهد د ایران تابناک خبري اژانس سره په مرکه کې ویلي، حکومت د نورو هېوادونو پرتله له ایرانه زیاته تمه لري، چې پر رسمیت يې وپېژني.
مجاهد زیاتوي: « موږ د اقتصادي اړیکو په ګډون په ډېرو برخو کې له ایران سره ښه همکاري لرو او په دې برخه کې ښه ډاډ هم شته؛ خو له ایرانه مو تمه ډېره ده، چې د نورو هېوادونو پرتله زموږ د رسمیت پېژندلو او د هغه د اعلانولو په برخه کې ډېر تعاملات ولري او دا اعلان دې د ایران اسلامي جمهوریت په لومړیتوب کې وي.»
له دې سره د بهرنیو چارو وزارت سرپرست مولوي امیر خان متقي وايي، وروستیو اونیو کې کابل ته د ګڼو هېوادونو او نړیوالو سازمانونو د استازو راشه درشې زیاتوالی د دې ښکارندویي کوي، چې افغانستان له ټولو هېوادونو سره د تعامل په برخه کې ډېر مخته تللی دی.
متقي زیاتوي: « د بېلابېلو هېوادونو او لویو سازمانونو پلاوي راغلل او بېلابېلو برخو کې یې غونډې درلودې چې دا هر څه د دې ښکارندویې کوي چې افغانستان اوس له نړۍ سره د تعامل په برخه کې ډېر وړاندې تللی الحمدالله.»
نوموړی وایي، له هېوادونو سره د سرپرست حکومت اړيکې ورځ تر بلې د پیاوړتیا په حال کې دي او له ټولو هېوادونو او په ځانګړې توګه له امریکا سره هم د ښو او مثبتو اړیکو غوښتونکی دی.
متقي زیاتوي، نړۍ دې دا درک کړي، چې په افغانستان کې اوسنی حکومت یو واحد دی او نړیواله ټولنه به هم ورسره مثبت تعامل وکړي.
هغه وايي: « د سیمې او نړۍ له هېوادونو سره ښې اړیکې لرو او همداشان له غربي او اروپايي هېوادونو او امریکا سره هم مثبتې اړیکې غواړو. د مسوولینو او اسلامي امارت د وزیرانو بېلابېلو هېوادونو ته سفرونه ټول د دې ښکارندویې کوي چې اوس دا درک او منل شوې چې د افغانستان موجوده حکومت په دې هېواد واحد مسلط حکومت دی، ولس یې تر شا ولاړ دی او نړۍ که تعامل کوي نو همدې نظام سره به یې کوي.»
د سیاسي او نړیوالو اړیکو کارپوهان بیا وایي، سرپرست حکومت باید د اساسي قانون په رامنځته کولو سره داخلي او بهرنی مشروعیت ترلاسه کړي څو له هغې وروسته رسمیت پېژندلو ته زمینه برابره شي.
د سیاسي چارو کارپوه ادریس محمدي ځاځی وايي: « له همدې یوې سرچینې هم په ایران او هم په افغانستان بندیزونه لګېدلي؛ نو په داسې حالاتو کې بیا له ایرانه ډېره تمه کېږي چې افغانستان پر رسمیت وپېژني او وکولی شي هغه بندیزونه چې پر دوی باندې دي افغانستان ورسره مرسته وکړي او په افغانستان چې کوم بندېزونه دي ایران ورسره مرسته وکړي.»
د سیاسي چارو کارپوه محمد سلیم پیګیر وايي: « ایران باید پر رسمیت پېژندنه کې لومړیتوب وکړي، ځکه چې له ایران سره د افغانستان اړیکې ډېرې نږدې دي.»
په افغانستان کې واک ته د اسلامي امارت له بیا رسېدو نږدې درې کاله په پوره کېدو دي؛ خو تراوسه هېڅ هېواد پر رسميت نه دی پېژندلی.
په افغانستان کې د ټولشموله حکومت جوړېدل، نجونو د زده کړو، ښځو د کار حق ورکول او له ترهګرۍ سره مبارزه د رسميت پېژندنې لپاره هغه شرایط دي، چې د نړیوالو په باور لا تر اوسه کابل نه دي پوره کړي.
