د قطر او ترکیې په هڅو د کابل او اسلام اباد ترمنځ شوي اوربند په ۱۸ مه ورځ د پاکستان پوځ په خوست، پکتیکا او کونړ ولایتونو کې هوايي بریدونه کړي او عامو وګړو ته یې مرګ ژوبله اړولې.
د دوحې او استانبول د خبرو پر مهال د پاکستان پوځ دا منلې وه چې د افغانستان په هوايي حریم به تېرې نه کوي، خو د تېرې شپې په هوايي بریدونو کې ولیدل شول چې نه یوازې د افغانستان د هوايي حریم بې احترامي یې کړې بلکې عام خلک یې هم په نښه کړي.
د اسلامي امارت ویاند ذبیح اله مجاهد په یوه بیان کې ویلي، د پاکستان یرغلګرو ځواکونو په دې حملو کې د خوست په ګربز ولسوالۍ کې لس عام وګړي شهیدان کړي چې له ډلې یې یوه زنانه او نهه ماشومان دي.
د اسلامي امارت ویاند ذبیح الله مجاهد وايي: « تېره شپه ۱۲ بجې[ د لیندۍ درېیمه] د خوست ولایت ګربزو ولسوالۍ مغلګۍ سیمه کې د پاکستان تېري کوونکي پوځ د ولایت خان په نوم د یوه عام وګړي پر کور بمبار کړی چې په کې د یوې کورنۍ لس کسه شهیدان شوي. په شهیدانو کې یوه زنانه او نهه ماشومان چې څلور یې نجونې وې، شامل دي. په بمبارۍ کې د ولایت خان کور په بشپړه توګه له منځه تللی. د پکتیکا او کونړ ولایتونو په ځینو سیمو هم بمباري شوې چې په کې څلور عام وګړي ټپیان شوي دي.»
په ورته وخت کې د خوست د والی ویاند مستغفر ګربز هم په ګربز ولسوالۍ کې د پاکستان په هوایي برید کې د نهو ماشومانو په ګډون د لسو عام وګړو شهادت تایید کړی دی.
د خوست ولایت د والي ویاند مستغفرګربز وايي: « تېره شپه[د لیندۍ درېیمه] شاوخوا ۱۲ بجې د خوست ولایت ګربزو ولسوالۍ اړوند مغلګي سیمه کې پاکستاني متجاوز پوځ د یو تن ملکي وګړي پر کور بمبار کړی چې له امله یې ۱۰ تنه په شهادت رسېدلي، په شهیدانو کې پنځه تنه هلکان، څلور نجونې او یوه ښځه شامل دي.»
د کونړ د اطلاعاتو او کلتور رییس هم له شمشاد سره په خبرو کې پر دې ولایت د پاکستان هوایي بریدونه تایید کړي او وايي، بریدونو کې پنځه عام وګړي ټپیان شوي.
د سیاسي چارو کارپوهان د پاکستان له خوا د تېرې شپې بریدونه د افغانستان پرهوایي حریم ښکاره تېری بللی او په خبره یې، د ګربزو ولسوالۍ کې د بې ګناه خلکو، ښځو او ماشومانو شهیدانول د پاکستان بېکفایته او بزدلانه عمل دی.
د سیاسي چارو کارپوه شهزاده مسعود وايي: « متأسفانه پاکستان یو ځل بیا زموږ په درېیو ولایتونو بمباري وکړه او په ځانګړې توګه خوست ولایت کې یې زموږ یو شمېر هېوادوال په شهادت رسولي. د پاکستان دا عمل نه د ګاونډیتوب له اصولو سره سمون لري او نه هم له نړیوالو قوانینو سره. که پاکستان په خپله پالیسۍ کې اساسي بدلون رانه ولي، دا ډول اعمال به په راتلونکي کې دوی ته ډېر بد عواقب ولري.»
له دې وړاندې د تلې یا میزان میاشتې په ۲۳مه د پاکستان پوځ د کندهار په سپین بولدک ولسوالۍ بریدونه وکړل چې په کې ۱۲ عام وګړي شهیدان او شاوخوا سل نور ټبیان شول.
د کابل او اسلام اباد ترمنځ دا اوربند د قطر او ترکیې په منځګړیتوب د دواړو لوریو ترمنځ د خبرو او مذاکرې درې پړاوونه ترسره شول، خو له اوربند پرته په کې نور پرمختګ ونه شو.
د پاکستان له خوا دا اوربند داسې مهال مات شوی چې اوس هم د سیمې یو شمېر هوادونه هڅه کوي د افغانستان او پاکستان ترمنځ روانه شخړه هواره کړي.
