د طالبانو ویاند ذبیح الله مجاهد وايي،د ټول شموله او موقت حکومت لپاره هڅي رواني دي او ډېر ژر به وروستۍ پریکړه اعلان شي.
مجاهد زیاته کړه:« په دې اړه دومره ویلی شم،چې هڅې جدي روانې دي، ترڅو ژر پایله ورکړي او یو حکومت جوړ شي. البته په دې اړه نور جزئیات موږ ته تر اوسه پورې نه دي رارسېدلي،خو هېله ده،چې ډېر ژر به پایله ورکړي.»
په ورته وخت کې مجاهد وايي، د پنجشیر په تړاو تر اوسه پورې کومه پریکړه نه ده شوې.
هغه وايي،د ستونزې حل لپاره خبرې روانې دي خو دغه ولایت هم له بېلا بېلو خواوو کلابند دی.
اخوا د سیاسي چارو یو شمېر شنونکي بیا وايي، غوښتنه یې دا ده،چې ژر دې ټول شموله او یاهم موقت حکومت اعلان شي،ترڅو افغانستان له یوه بل ستر ناورین سره مخ نه شي.
د سیاسي چارو شنونکی محمد نبي افغان وايي:« له لومړۍ ورځې راهېسې چغې ووهو،چې ملت له بحران سره مخ دی. له تېر حکومته شااوخوا ۳۵۰ زره کسانو تنخوا اخېستله او په هغې به یې خپل کور چلاوه. د میاشت اخر کې به یې پیسې خلاصېدې. هغه ټول کسان اوس مهال بې برخلیک پاتې دي. »
ځیني نور بیا په دې باور دي،چې د ټول شموله حکومت ځنډ به د دې لامل شي،چي افغانستان له یوه ستر اقتصادي بحران سره مخامخ شي.
د سیاسي چارو شنونکی میرویس حاجي زاده وايي:« کارخونې ټولې پر ټپه ولاړې دي. که همدا حالت څو ورځې نور هم دوام وکړي.نو افغانستان به له یوه لوی بحران سره مخامخ شي.»
ویل کېږي،ټول شموله حکومت کي به ټول هغه چارواکي شامل وي،چي دا مهال له هېواد څخه بهر دي او ټول قومونو ته به هم ونډه ور کول کیږي.
