Skip to content
د بښنې نړیوال سازمان غوښتنه کړې،چې په افغانستان کې د جنګي جرایمو د څیړنې لپاره دې محکمه جوړه شي او جنګي جنایتکاران دې په کې محاکمه شي.
خو د اسلامي امارت ویاند ذبیح الله مجاهد بیا وايي، له هغې وروسته چې ناټو، امریکا او د جنګي جرایمو عوامل له افغانستانه وتلي، د داسې جرایمو مخه نیول شوې.
مجاهد وايي،د جنګي جرایمو مخنیوي په برخه کې یې محاکم جدي دي او په خبره یې هېچاته د جرایمو ترسره کولو اجازه نه ورکوي.
د مجاهد په خبره، د هغو مجرمینو چې تیر ۴۰ کاله یې په افغانستان کې جنګي جرایم ترسره کړي،ټول غربي هېوادونو ته ورغلي او که ریښتیا هم دوی د بشر حقونو پالونکي وي، نو باید هماغلته یې محاکمه کړي.
هغه زیاته کړې:« له هغې وروسته چې اشغال پایته ورسیده، په افغانستان کې د جنګي جرایمو مخه نیول شوې ده او د جنګي جرایمو عاملین له افغانستان وتښتېدل او بیا جرایم نه دي ترسره شوي. د اسلامي امارت ټول محاکم په دې بوخت دي،چې څوک پرې نږدي چې جرایم ترسره کړي. دغو مغرضو نهادونو چې د جنګي جرایمو د څیړنې محکمې د جوړېدو خبره کړې ده،هغوی له دغسې مسایلو نه سیاسي استفاده کول غواړي،که ریښتیا هم دوی جنګي جرایم څیړي نو هغه مجرمین چې ۴۰ کاله یې د افغانستان ولس ځورولی دی او جنایت ترسره کړي دي، ټول دوی ته ورغلي دي ورسره ناست دي او پناه ورکړل شوې ده او ملاتړ یې کیږي، نو هلته دې دغه مجرمین ونیسي.»
د سیاسي چارو یو شمېر کارپوهان بیا وايي، هغه چې مجرمین دي او په تیرو ۲۰ کلونو او یاهم له دې وړاندې یې جنګي جرایم ترسره کړي دي،د دې پرځای چې محاکمه شي،برعکس د همدې بنسټونو او هېوادونو تر حمایت لاندې دي او پناه یې ورکړې.
د سیاسي چارو کارپوه عزیز معارج وايي:« په افغانستان کې دا ۴۴ کاله کیږي،چې د ځینو کړیو له خوا نه جنګي جنایات ترسره کیږي،خو هغه ادارې چې د جنګي جنایاتو د څیړنې خبرې کوي، ټول غلي دي،په داسې حال کې چې زمینه هم ورته برابر ده، همدا اوس ټول هغه جنګي مجرمین،چې افغانستان کې یې جنګي جنایات ترسره کړي دي، د دوی په هېوادونو کې دي. دوی ویزې ورکړي دي،دوی اقامت ورکړی دی ،خو څه ورته نه وايي برعکس د دوی تر ملاتړ لاندې دي.»
د سیاسي چارو کارپوه توریالی ځاځی بیا وايي، هغه مهال به د بشر حقونو مدافع نړیوالو ادارو پر شعارونو باور وکړي،چې بهر هېوادونو ته ورغلي په جنګي جنایت تورن افغانان او جنګسالاران محاکمو ته معرفي کړي او د څلور لسیزو جګړو قربانیانو لپاره عدالت تامین کړي.
ځاځي زیاته کړه:« زما له نظره دا دروغ دي، که واقعآ د دیموکراسۍ ، د بشرحقونو او د عدالت مدافعین وي،نو باید ډېر مخکې یې باید جنګي جنایتکاران محکمې ته معرفي کړي وای، خو جنګي جنایتکاران د دوی په غیږ کې شاهانه ژوند لري. موږ ته هغه وخت د دوی دغه خبرې د منلو دي،چې لومړی دویهغه جنګسالاران، چې دا ولس او هېواد یې له خاورو سره برابر کړی دی، نړیوالې جنګي محکمې ته معرفي کړي.»
په ټوله کې هغه کسان په جنګي جنایتونو تورن دي،چې د جګړې اصول یې مات کړي، بې ګناه کسان یې وژلي،خو تراوسه نه دي محاکمه شوي.
په تیرو شلو کلونو کې د ناټو ائتلاف ځواکونو هم په سلګونه جنګي جنایتونه ترسره کړي، جګړه کې یې عام افغانان وژلي،چې د ځينو هېوادونو پوځي مشرانو شوي جنایتونه او په دې تړاو شته ادعاوې هم څېړلې دي.
