په داسې حال کې چې د افغانستان په تړاو د دوحې په تېرو دوو ناستو کې د افغانستان سرپرست حکومت پلاوي ګډون نه درلود، خو په درېيمې ناسته کې يې ګډون د يادې ناستې د پايلو په اړه خوشبيني زياته کړې.
سرپرست حکومت له دې وړاندې ویلي ول، چې د استازو له ګډون پرته يې د افغانستان په تړاو جوړېدونکې د هرې کچې غونډې پایله نه شي ورکولی.
خو د دوحې په درېیمه ناسته کې چې د اسلامي امارت استازي په کې ګډون درلود، پوښتنه دا ده چې د افغانستان لپاره یې پیغام څه وو او کومې لاسته راوړنې درلودې ؟
د سیاسي چارو شنونکي په دې باور دي، چې له نړۍ سره د فکري واټن کمېدو لپاره په هېواد کې د اقتصادي پرمختګ، اقلیمي بدلونونو او د نشهیي توکو پر وړاندې مبارزه نړيوال باید په پام کې ونیسي او د بدیل لپاره یې باید لاس په کار شي.
د سیاسي چارو شنونکی ادریس محمدي ځاځی وايي:« له نړیوالو سره سوی تفاهم لرې کول، له نړیوالو سره د فکري واټن کمېدل او له نړیوالو سره په هغو موضوعاتو خبرې کول چې هغه ګونګې پاتې شوي،ځکه چې هغه استدلال او دلیل چې د اسلامي امارت نماینده ګانو هلته وړاندې کړ، هغه نړیوالو ته هم د منلو وړ وه. د بېلګې په ډول د اسلامي امارت نماینده ګانو وویل، چې دوی د کوکنارو کښت یا د نشه يي توکو کښت صفر ته رسولی، خو نړیوالو تر اوسه پورې په دې برخه کې د افغانستان کرنې سکتور سره یا د افغانستان له بزګرانو سره هېڅ بدیل مرسته نه ده کړې. »
ځېنې نور بیا دغه ډول ناستې د اسلامي امارت لپاره د پياوړتیا ټکي بولي؛ څو د نړیوالو غوښتنو ته قناعت کوونکي ځوابونه وویل شي او د سرپرست حکومت رسمیت پېژندنې ته لاره هواره شي.
دوی وایي، له هرې ممکنې لارې په استفادې اسلامي امارت باید له نړۍ سره مثبت تعامل ته لاره هواره کړي، چې افغانستان له اوسنۍ سیاسي انزوا را ووځي.
خو دا ځل د اسلامي امارت ویاند پر مشرۍ پلاوي چې په دې ناسته کې یې ګډون کړی وو، دغه ناسته د افغانستان پر ګټه بولي او په خبره یې، په نړيواله کچه دا درک رامنځته شوی، چې هېوادونه د فاصلې پر ځای باید تعامل ته رامخکې شي او تر دې دمه د بندیزونو او فشارونو سیاستونو پایله نه درلوده.
مجاهد زیاتوي:«په ټولکه کې موږ د دوحې په ناسته کې درک کړه. لومړی: نړۍ په افغانستان کې پرمختګونه درک کړي او دا مني. دویم: درک رامنځته شوی چې هېوادونه باید د فاصلې پر ځای له افغانستان سره نږدې شي، ځکه فاصلې ګټه نه کوي، نور باید د نږدې کېدو لارې چارې ولټول شي، دا درک هلته حس کېده. د فشارونو او بندیزونو سیاستونه نور پایله نه ورکوي او باید رغنده تعامل لاره خلاصه کړي. موږ په ټوله ناسته کې دا شی حس کړه. په ټوله کې ناسته د افغانستان پر ګټه تمامه شوه.»
ذبیحالله مجاهد وایي، دغه ناسته د افغانستان او ملي منافعو په پام کې نیولو سره ترسره شوې او وې کولی شول چې ګډون په کې وکړي.
د نوموړي په خبره په دې ناسته کې له ګډون سره يې نړۍ له خپل دریځ باخبره کړې او په خبره يې دا له ورایه ښکارېده، چې د افغانستان په تړاو د نړيوالو دريځ مثبت شوی دی.
