طالبانو ویلي په غزني کې یې د امریکا یوه پوځي الوتکه ویشتلې ده.
غزني کې یوه بهرنۍ الوتکه لوېدلې چې په اړه یې ضد و نقیص راپورونه شته.
د غزني ولايتي چارواکي تائيدوي، چې ده یک ولسوالۍ کې یوه الوتکه لوېدلې ، خو دا چې څومره کسان پکې وژل شوي مالومه نه ده.
د سیمې خلکو د الوتکې د یو پيلوټ جسد موندلی او ویلي یې دي چې بهرنی دی.
په لومړيو کې ويل کېدل، چې دغه الوتکه د یو داخلي شرکت اړوند ده؛ خو داخلي شرکتونو دا راپورونه رد کړل.
د الوتکې د رالویدو لامل تر اوسه نه دی څرګند، خو د غزني د والي ویاند له ملي ټلویزیون سره خبرو کې ویلي، په دې تړاو څېړنې پيل شوي دي.
خو طالبانو په یوه اعلامیه کې لیکلي چې د غزني ده یک ولسوالۍ کې امریکايي الوتکه دوی ویشتلې.
طالبانو ویلي چې دا الوتکه د غزني ده یک ولسوالۍ کې استخباراتي ماموریت باندې بوخته وه چې د سي اې ای مهم کسان پهکې شامل و او ټول یې وژلي دي.
طالبانو ویلي، چې د الوتکې بدنه او د مړو جسدونه د دوی تر کنټرول لاندې سیمه کې دي.
وړاندې له دې داسې راپورونه و چې دغه الوتکه مسافر وړونکې ده چې له هرات څخه کابل ته پر لاره وه.
