د کار او ټولنیزو چارو وزارت سرپرست عبدالمنان عمري له څو ورځني سفر وروسته بېرته کابل ته راستون شو او له رسنیو سره يي د سفر موخه او لاسته راوړنې شریکې کړې.
عمري وايي، قطر او روسيې ته يې د سفر په لړ کې د بېلابېلو هېوادونو له چارواکو او سوداګرو سره ليدنې کړي او له افغانستان سره يې د مرستو ژمنې ترلاسه کړي دي.
هغه زیاتوي: « هلته مو د قطر د کار او ټولنیزو چارو وزیر سره ولیدل، خبرې مو ورسره وکړې او وضاحتونه مو ورکړل، ترڅنګ یې د سوداګرۍ خونې له رئیس سره مو هم غونډه درلوده چې په دواړو کې مو الحمدالله تر ډېره ژمنې ترلاسه کړې او په راتلونکي کې به په دې تړاو میکانیزم جوړېږي چې له مخې به یې زموږ هېوادوال کولی شي هلته کار وکړي.»
د عمري په خبره د روسيې کازان ناستې په غونډه کې چې شاوخوا ۳۵ هېوادونو استازو په کې ګډون کړی و، د ډېری هېوادونو له چارواکو او سوداګرو سره يي خبرې کړې او هغوی ورته د هر ډول همکاریو ژمنې ورکړي.
عمرې وايي: « غونډه چې د روسیې په ښار کې جوړه شوې وه او په دې جریان کې مو د روسیې د کار له وزیر سره هم په دې اړه خبرې درلودې، چې هغه جمهوریتونه چې اوسمهال په کې افغانانو لپاره د کار زمینه برابرېدلی شي او په ورته وخت کې اسلامي شعار هم په خپل ځای پاتې وي، لکه: چیچنیا، تاتارستان او دې ته ورته نور هېوادونه؛ نو هلته باید ورته د کار اجازه ورکول شي او د دوی هم نظر او مشوره دا وه، چې ان شاءالله په راتلونکي کې به له افغانانو موږ د کرنې په برخه کې کار اخلو.»
نوموړي له بهر مېشتو افغانانو غوښتنه وکړه چې د کډوالو نړیوالو نورمونو ته دې درناوی وکړي او د یوه فردي شخص د جرم جزا دې زرګونو نورو افغانانو ته نه ورکوي.
عمرې زياته کړې، روسيه کې د کازان ناستې په څنډه کې د ډېرو هېوادونو سوداګرو ژمنې وکړې چي په افغانستان کې به په بېلابېلو برخو کې پانګونه کوي او په دې توګه به په کور دننه بې روزګاره ځوانانو ته د کار کولو زمينه برابروي.
