د عدلیې وزارت چارسمبالي عبدالحکیم شرعي د مدافع وکیلانو ټولنې دېرش تنه غړو ته د کار اجازه لیک ورکولو مراسمو ته په یوه غږیز پيغام کې وویل، مدافع وکیلان د تورنو کسانو د قضيو پر مخ وړلو کې بشپړه ازادي لري او د تېر په شان به سانسور نه وي.
شرعي وايي:« په پوره ډاډ او جرأت باندې له خپل موکل نه د اصولو په چوکاټ کې دفاع کولای شئ. ستاسو شاته يو لوی ارګان،چې د عدليې وزارت په نامه دی،هغه به ستاسې ملاتړی وي او ستاسو نه به هر قسم دفاع کوي.»
د عیدالیې وزارت ویانند محمد بشار وايي، هغه مدافع وکيلان چې د کار او فعالیت جوازونه ولري، دوی یې بیا تمدیدوي او د فعاليت اجازه ورکوي.
بشار وايي:« موږ غواړو دا پروسه نوې کړو او د راتلونکو وکيلانو له پاره دا پروسه پیل کړو. د اوس مدافع وکيلانو لپاره کوم نوی پلان نه لرو، تيار دوی کار کړی دی،تجربه لري، مسلکي دي،هغوی ته جوازلیکونه ورکوو،چې دا ولاړ کارونه روان شي، کله چې موږ د نوي مدافع وکيلانو ګومارولو برخه کې کار کوو،د هغوی لپاره به دغسې پروسه جوړوو،خو معياري.»
مدافع وکيلان هم خوښ دي،چې عدليې وزارت ورته د فعالیت جواز تر څنګ په کاري برخه کې د ازادۍ حق ورکړ او ژمنه یې وکړه،چې د موکلینو قضیې به په پوره دقت او بې طرفۍ حل کوي.
