Skip to content
طالبانو خبر ورکړی چې د حکومت د جوړېډو لپاره چارې بشپړې شوي دي او ژر به یې اعلان کړي.
طالبانو خلکو او نړیوالو ته د یو ټول ګډونه حکومت د جوړېدو کلکه ژمنه ورکړې ده داسې حکومت چې هېڅ یو لوری به حذف نه وي.
روسیې دا شرط وړاندې کړی دی، که طالبان ټول شموله حکومت جوړوي،مسکو به په مراسمو کې برخه اخلي.
بل پلو ایران بیا د ټاکنو له لارې افغانستان کې د حکومت ملاتړ کړی دی.
د سیاسي چارو یو شمېر تحلیل کوونکي وایي،اوس مهال چمتوالی نیول شوی او طالبان به د ټولو په خوښه حکومت اعلان کړي.
د پوهنتون استاد فیض محمد ځلاند وايي:« طالبانو په دې وروستیو کې د نوي حکومت لپاره هڅې چټکې کړي دي،تر څو نوی حکومت اعلان کړي. چمتوالی نیول شوی دی، د نوي حکومت بڼه جوړه شوې سرپرسته اداره به وي لنډې مودې لپاره څو وکولای شي، لویه جرګه راوغواړي، نوی اساسي قانون جوړ شي. په دې برخه کې ځنو هېوادونو ته د بلنې لیکونه استول شوي.»
خو د هغو هېوادونو په ګډون شک کېږي،چې تېرو شلو کلونو کې طالبانو سره په جګړه وو.
د امریکا متحده ایالتو ولسمشر او د بریټانیا لومړي وزیر ویلي وو،چې په دې اړه پرېکړه وخت ته اړتیا لري.
د خلاصون لارې شورا مشر سیدا اکبراغا وايي:«د نوي حکومت د اعلانېدو وخت نږدې شوی دی،ځکه طالبان وایي دوه ورځو کې به اعلان شي،دا چې نړیواله ټولنه په دې مراسمو کې برخه اخلي او یانه. زه فکر کوم، د اسیا یو شمېر هېوادونه به برخه واخلي،خو د دا نشم ویلی،چې د اشغال په صورت کې چې کوم هېوادونه وو، دوی به برخه واخلي او کنه.»
د شنونکو په وینا د نړیوالې ټولنې شرایط د طالبانو لپاره سخت نه دي او په پلي کېدو سره به یې طالبان د ټولې نړۍ له لوري په رسمیت ومنل شي او هم به په هغو مراسمو کې برخه واخلي،چې طالبان په کې خپل حکومت اعلانوي.
د سیاسي چارو تحلیل کوونکی عزیز معارج وايي:« زه تر ډېره بریده پورې متیقین یم،چې نړیواله ټولنه به د طالبانو په مراسمو کې برخه اخلي او هم یې په رسمیت پېژني،خو دوی یو شمېر شرطونه لري. که طالبان نړیوال قوانین،بشرحقونه او ټول شموله حکومت جوړ کړي، دوی به خامخا افغانستان سره سیاسي اړیکي ولري.»
اوس به ولیدل شي،چې د طالبانو د حکومت اعلان ته اوږد انتظار څنګه لنډیږي،خو هغه څه چې افغانانو ته اړتیا ده،هغه د حکومت ژر جوړېدل دي،چې د خلکو کار او بار ورسره روانیږي.
