امنیت شورا طالبانو ته د سولې خبرو پرمخ بیولو لپاره د یوه میکانیزم وړاندیز کړی.
د افغانستان د ملي امنیت شورا ویلي٬ د میکانیزم له مخې به طالبان له موږ سره د حل لارې موندلو لپاره کار وکړي٬ چې زندانیان یې خوشي شي.
حکومت ویلي چې نن شنبه به د طالب زندانیانو د خوشې کیدو لړۍ پیل کیږي خو دا لړۍ داسې مالومېږي چې د یوې مودې لپاره ځنډول شوې ده.
د امنیت شورا ویاند په خپله ټویټر پاڼه کې لیکلي چې د طالبانو د سولې د خبرو د مخکې بیولو لپاره یې هغوی ته د یوه میکانیزم وړاندیز کړی٬ چې له دې لارې طالبان باید له موږ سره د حل لارې د موندلو لپاره کار وکړي، چې بندیان یې خوشې شي او سولې ته اړ شي.
جاوید فیصل داسې لیکلي (( موږ د سولې پروسې پر مخ بیولو لپاره یو مکانیزم وړاندېز کړی. د دې میکانیزم له مخې طالبان باید له موږ سره د حل لارې د موندلو لپاره کار وکړي، چې بندیان یې خوشي شي او سولې ته اړ شي.
پرېکړه اوس د دوی سره ده، چې د ستونزې برخه پاتې کیږي او که د حل برخه ګرځي))
د خلاصون لارې شورا مشر سید اکبر اغا بیا وايي٬ طالب مشران د ټولو زندانیانو د ازادیدو غوښتنه کوي او پرته له هغې به بین الفغاني مذاکراتو ته لاره هواره نشي.
د ملي شورا غړي د طالب زندانیانو د ازادیدو په تړاو خوشبینه دي چې د سولې خبرو ته به لاره هواره شي خو یو لړ اندیښنې هم لري چې ګواکي بیرته جګړو ته مخه نه کړي.
د ولسمشر غني د فرمان له مخې باید هره ورځ سل طالب زندانیان خوشي شوي واي خو تر اوسه د زندانیانو د خوشي کولو لړۍ نه ده پیل شوې.
