Skip to content
ملي سوداګر او د صنعت او سوداګرۍ خونې مسوولین وایي، مسوولینو سره ناسته کې ډاډ ورکړل شوی، چې یو شمېر هېوادونو د اقتصادي پراختیا او پانګونې برخو کې د همکاریو او مرستو ژمنې کړي دي.
د صنعت او سوداګرۍ خونې مرستیال یونس مومند وايي، که طالبان په اقتصادي برخه کې فساد له منځه یوسي، اقتصادي چارې به چټکې او کاري فرصتونه به زیاد شي.
مومند زیاتوي:«زه فکر کوم، که چیرې طالبان په اقتصادي برخه کې فساد له منځه یوسي، د هېواد د رغېدو امکان ډېر دی، په شخصي سرمایه اوس مهال بهرنۍ الوتنې بندې دي او د هوا له لارې سوداګرۍ نه ترسره کېږي.»
اخوا د اسلامي امارت مسوولین د افغانستان اقتصادي ودې او پانګونې برخه کې بهرنۍ پانګونه مهمه بولي او تمه لري، چې یو شمېر هېوادونه به افغانستان کې پانګه اچونه وکړي.
د اسلامي امارت ویاند ذبیح الله مجاهد وايي:« افغانستان بیا رغونې ته اړتیا لري. دلته باید سرمایه ګذاري وشي، موږ نړیوالو همکاریو ته اړتیا لرو. موږ د چین اړیکو او د بیارغونې برخه کې مرستې ته اړتیا لرو، چې باید وې کړي او د سوداګریزو اړیکو لپاره هغوی باید موږ په رسمي ډول وپیژني.»
اسلامي امارت، چې په ټولو برخو کې د اصلاحاتو راوستو باندې ټینګار کوي وایي، نړیوال اقتصادي برخو کې د مرستو لپاره ورسره په اړیکه کې دي او د پانګونې ژمنې یې ورسره کړي دي.
