په قطر هېواد کې د افغانستان سفیر په خپله تازه مرکه کې د افغانستان پر وړاندې د پاکستان استخباراتي ادارې له تبلیغاتي جګړې پیلولو پرده پورته کړه.
محمد سهیل شاهین ویلي، د پاکستان پوځي رژیم استخباراتي اداره(آیاېسآی) غواړي د واشنګټن پېښه چې یو افغان په کې د سپینې ماڼۍ پر ساتونکو برید کړی، له اسلامي امارت سره وتړي او په دې ډول افغان حکومت بدنام کړي.
شاهین زیاته کړې، ممکن په دې پېښه کې بهرنۍ استخباراتي کړۍ هم ښکېلې وي او موخه یې د امنیتي ګواښ په توګه د افغانانو معرفي کول وي.
دوحه کې د افغانستان سفارت سرپرست سهیل شاهین ویلي: « د پاکستان استخباراتي اداره یا آیاېسآی غواړي د واشنګټن وروستۍ پېښه د افغانستان اسلامي امارت سره وتړي او له دې سره یې موخه د افغان حکومت بدنامول دي. دا امکان هم شته چې په دې پیښه کې بهرنۍ کړۍ لاس ولري او غواړي افغانان د یوه امنیتي تهدید په توګه وښي.»
تحلیلوونکي بیا په دې اند دي چې له هغې وروسته چې د پاکستان پوځي رژیم له افغانستان سره په مخامخ جګړه او بیا په مذاکراتو کې ماتې وخوړه، اوس د دې هېواد استخباراتي ادارې تبلغاتي جګړه پيل کړې، خو د افغان حکومت عیني واقیعتونو ته په کتو، پاکستانی لوری به په دې برخه کې هم ناکام پاتې شي.
د دوی په باور، اوس نړۍ د افغانستان عیني واقیعتونه درک کړي او هېڅکله به هم د نورو له عینکو افغانستان ته ونه ګوري.
د پوهنتون استاد فیض محمد ځلاند وايي: « پاکستان اوس په دې لټه کې دی چې اسلامي امارت په نوره نړۍ کې ناکام او د ترهګرۍ ملاتړ معرفي کړي. ښه به دا وي چې افغان ملت او حکومت په ګډه د پاکستان د شومو دسیسو په اړه یو لاس شي او د یوې ملي جرګې په اډانه کې وکولی شي د پاکستان خلاف یو ملي دریځ ونیسي؛ ترڅو اجازه ورنه کړو چې پاکستان په خپله لوبه کې بریالی شي.»
د چارو شنونکی نجیب الرحمان شمال وايي: « پاکستان په سیمه کې د سیاسي، امنیتي او ډېپلوماټیکو ناکامیو وروسته، غواړي د افغانستان د خلکو او حکومت پر وړاندې نوې تبلیغاتي جبهه پرانیزي. څرنګه چې موږ وینو، پاکستاني چارواکي هڅه کوي په نړۍ کې هره تروریستي پېښه له افغانستان سره وتړلي، حال دا چې دا ډول پېښې له افغانستان سره هېڅ ډول اړیکه نه لري.»
کارپوهان بیا وايي، په امریکا کې رامنځته شوې وروستۍ پېښه چې د رحمان الله لکڼوال په نوم یو افغان تبعه په کې ښکېل دی، افغانستان پورې هېڅ ډول تړاو نه لري. د دوی په نظر، د قوانینو پر بنست جرم فردي دی، خو د ګاونډي دا پروپاګنډا چې غواړي په راتلونکي کې افغانستان لپاره ګواښ پېښ کړي، هېڅ ځای نه نیسي.
د سیاسي چارو شنونکی ادریس محمدي ځاځی وايي: « د افغانستان استازیتوب یو شخص نه شي کولی او له بلې خوا له شریعت نیولې تر نړیوالو بشري قوانینو پورې ټول په دې متفق دي چې جرم فردي عمل دی او څوک نه شي کولی د مجرم کس کورنۍ، هېواد یا خپلوان مجرمان وګڼي. دا اوس چې کوم تبلیغات روان دي، د افغانستان د حکومت او خلکو د بدنامولو هڅه ده، خو دا هدف به هم د افغانانو له خوا شنډېږي.»
افغان حکومت بیا تل ټینګار کړی چې ټولو هېوادونو ته ډاډ ورکوي چې د افغانستان له خاورې به ورته ګواښ پيښ نه شي او چاته به اجازه ورنه کړي چې د افغانستان په بهرکې د بریدونو لپاره وکاروي.
