سپینې ماڼۍ اعلان کړی چې د هغو افغانانو اسناد له سره څېړي چې د مخکیني ولسمشر جوبایډن ادارې په مهال له افغانستان څخه د امریکايي ځواکونو د ایستلو په مهال امریکا ته وړل شوي دي.
د سپینې ماڼۍ ویانده وايي، د جوبایډن هغه پالیسي هم له سره اروزل کېږي چې د افغان کډوالو او پناه ورکونکو لپاره جوړه شوې وه او له مخې یې نږدې ۱۰۰ زره افغانان امریکا ته انتقال شول.
کارولین لېویټ زیاتوي، هغه کډوال چې د امریکا ملي امنیت ته احتمالي ګواښ پېښوي، د امريکا پرېښودلو او خپل اصلي هېواد ته پرتګ به اړ ایستل شي.
نوموړې زیاته کړې: « موږ به هغه کډوال وباسو چې زموږ د هېواد ملي امنیت ته خطر پېښوي. موږ د پناه غوښتنو د ارزونې ټول بهیر درولی او ښکاره خبره ده چې د کډوالۍ ځانګړې ویزې(اېسآیوي) هم چې د بایډن ادارې پر مهال په کې ډېر افغانان امریکا ته راغلي، اوس ځنډول شوې دي.»
د سپینې ماڼۍ له خوا د افغانانو د اسنادو د بیا څېړلو خبره وروسته له هغې کېږي چې په واشنکټن کې د ملي ګارډ په عسکرو د ډزو له پېښې سره په تړاو یو افغان ونیول شو. په دې پېښه کې د امریکا د ملي ګارډ دوه سرتېري(یو نارینه او یوه ښځه) سخت ټپیان شول، خو وروسته ټپي شوې سرتېرې ساه ورکړه.
د سپنې ماڼۍ ویاندې همدارنګه یوځل بیا د امریکا پر پخواني ولسمشر جوبایډن نیوکه وکړه چې د هغه د ناکامو پالیسو له امله تر اوسه امریکایي وګړي سختې قربانۍ ورکوي.
د چارو څارونکي بیا وایي، امریکا نه باید د یوه کس فردي جرم له امله ټولو افغانانو ته د شک په سترګه وګوري.
د سیاسي چارو شنونکی خلیل احمد نادم وايي: « دا د ټولو افغانانو عمومي کړنه نه ده او امریکا باید په دې پوه شی چې افغانان ټول ترهګر او انسان وژونکي نه دي او دا هم نه شي کېدای چې د یوه رواني ناروغ انسان کړنې ته عمومیت ورکړل شي او حقوق یې پایمال شي.»
د چارو یو شمېر نور څارونکي بیا په امریکا کې د افغان کډوالو پر وړاندې روان چلن ته په اشارې دا ډول کړنې او څرګندونې له دسیسې خالي نه بولي.
د دوی په خبره، په دې اړه باید جدي څېړنې وشي او بیا د یوه وګړي کړنې پر ټولو افغانانو ور ونه تپل شي.
د سیاسي چارو شنونکی معین ګل څمکنی وايي: « پرته له دې چې د پېښې په اړه څېړنې وشي، ټرمپ دا حکم صادر کړ چې افغانان باید امریکا ته را نه شي. زما په اند، دا یوه دسیسه ده او د افغانستان د دښمنانو له خوا ډیزاین شوې ده.»
په ورته مهال، امریکا ته د تګ په تمه په پاکستان کې مېشتو افغان کډوالو په یوې اعلامیه کې ویلي، دوی باید د رحمانالله لکڼوال د انفرادي برید قرباني نه شي، هغه افغان چې په امریکا کې یې د ملي ګارډ پر دوو سرتېرو ډزې کړې وې. دوی له امریکا غوښتي چې امریکا ته دی د کډوالو د لېږد بهیر بېرته پیل کړي.
