عامې روغتیا وزارت د کرونا ويروس پر وړاندې چمتووالی نیولی.
عامې روغتیا وزارت وایي که کرونا ناروغي افغانستان ته راشي په شپږ میاشتو کې به درې زره کسان پرې اخته شي.
د عامې روغتیا وزیر وایي، دوی ددغه ویروس پر وړاندې چمتوالی نیولی او که احتمالان کوم افغان پرې اخته شي درملنه یې کوي.
د عامې روغتیا وزیر فیروز الدین فېرزو وایي، دوی د هغو افغان محصلینو لپاره هم چمتوالی نیولی چې اوسمهال په چین کې دي.
د چین له دولت سره خبرې روانې دي چې دغه محصلین هېواد ته راستانه شي .
د عامې روغتیا وزیر وایي که دغه محصلین راستانه شي د څو ورځو لپاره به یي قرنطین کړي چې مالومه کړي پر کرونا ناروغۍ نه دي اخته شوي.
کرونا ویروس چې په چین کې پيدا شوی تر دې دمه یې له دولس زرو زیات کسان نیولي او تر دې دمه ۳۰۴ کسان ترې مړه شوي دي.
ددغې وژونکې ناروغۍ پېښې د نړۍ په یو شمېر نورو هېوادونو کې هم ثبت شوې دي چې د روغتیا نړیوال سازمان بېړنی روغتیايي حالت اعلان کړی دی.
