د پاکستان کورنیو چارو وزیر له اسلامي امارت د ټي.ټي.پي پر ضد مبارزه کې د همکارۍ غوښتنه وکړه او تور یې پورې کړ چې د وروستیو پيښو طراحان افغانستان کې دي او د پنجشنبې په ورځ یې خپل مرستیال د یوه پلاوي پر مشرۍ کابل ته رالیږلی دی.
تازه د پاکستان د پوځ عامه اړیکو څانګې په یوه خبرپاڼه کې ویلي، د پوځ لوی درستیز عاصم منیر په راولپنډۍ کې یوې غونډې ته ویلي، پاکستاني وسله وال بریدګر د پاکستان د پوځ او ملکي وګړو پر ضد د افغانستان له خاورې ګټه پورته کوي.
د خبرپاڼې یوه برخه:« له افغانستانه د پولې په اوږدو کې پرله پسې سرغړونو او د افغانستان له خاورې د امنیتي ګواښونو د رامنځته کېدو په اړه جدي اندېښنې څرګندې کړې او یادونه یې وکړه چې د پاکستان مخالفین له افغانستانه د امنیتي ځواکونو او په پاکستان کې دننه بې ګناه ملکي وګړي پر نښه کوي.»
د پاکستان بهرنیو چارو وزارت وایي، د کورنیو چارو وزارت د مرستیال پر مشرۍ پلاوي کابل ته په سفر کې، د خیبر پښتونخوا په بشام سیمه کې پر چینايي وګړو د برید په اړه خپلې موندنې له افغان چارواکو سره شریکې کړي.
دغه وزارت په خپره کړې خبرپاڼه کې ویلي، د محمد خرم آغا پر مشرۍ یاد پلاوي د افغانستان د کورنیو چارو وزارت له مرستیال محمد نبي عمري سره په لیدنه کې د یاد برید د عاملینو پیدا کولو په برخه کې له اسلامي امارت د مرستې غوښتنه کړې.
د خبرپاڼې یوه برخه:« دغه غونډه کې چې بشام کې د ۲۰۲۴ کال د مارچ ۲۶مې پر پېښې متمرکزه وه، د کورنیو چارو وزارت مرستیال د بشام برید په اړه د پاکستاني حکومت موندنې شریکې کړې او د عاملینو پیداکولو په برخه کې یې له افغانستانه د همکارۍ غوښتنه وکړه.»
د پوځي چارو کارپوه محمد متین محمد خېل وايي:« دا چې پاکستان ادعا کوي چې دا له افغانستانه طرحه شوې. ګورئ په جرایمو کې کله چې طرحه په مغز کې کېږي، یعنی مغز کې یو څوک تصمیم نیسي، چې یو کار وکړي، ترڅو په عملي بڼه هغې ته قدم نه ږدي، دا جرم نه شي کېدلی. نو ځکه تاسو وګورئ، پښتونخوا ډېره وړاندې ده، مرکز یې پېښور دی، نو دا له افغانستانه ډېره لرې ده، هېڅ امکان نه لري، چې په دې ځای کې افغانستان ونډه ولري یا خلک له افغانستانه ورغلي وي، یا طرحه یې په افغانستان کې جوړه شوې وي.»
د اسلامي امارت ویاند ذبیح الله مجاهد د پاکستان وروستیو تورونو ته په غبرګون کې وایي، د پاکستان پوځ او حکومت یې مسوولیت لري چې د خپل هېواد امنیت تامین ته جدي هڅې وکړي او افغان حکومت د دوی د امنیت تامین ضامن نه دی.
مجاهد زیاتوي:« البته ځېنې امنیتي ستونزې په هېواد کې دي او ځېنې عوامل چې موجود دي، د هغو په لمنځه وړلو کې په خپله د پاکستان حکومت، امنیتي ځواکونه یې باید کار وکړي، چې هغه حل کړي. کومه برخه کې چې زموږ همکارۍ ته اړتیا وي، موږ هم همکارې کړې، کوو یې، خو له بده مرغه دوی تر اوسه هماغه تورونه تکرار کوي او کله کله د فضا خړ کېدو پر لور ګامونه اخلي، چې دا ګټور نه بولو. افغانستان او پاکستان دواړه وروڼه هېوادونه دي. دواړه وروڼه ملتونه دي. نو حکومتونه هم باید د خپلو ملتونو هغه مزاج، غوښتنې او منافع دقیقې په نظر کې ونیسي.»
دا په داسې حال کې ده، چې د امریکا بهرنیو چارو وزارت مرستیال ویاند، وېډانټ پټېل هم ویلي، چې امریکا له پاکستاني مشرانو سره د وسله والو ډلو سره د مبارزې په برخه کې په اړیکه کې ده او په دې برخه کې خپلو همکاریو ته دوام ورکوي.
