د پاکستان پوځي رژیم په وروستي هوایي برید کې د یوې کورنۍ د ښځو او ماشومانو په ګډون لس غړي شهیدان کړل.
د خوست ګربزو ولسوالۍ کې د دې کورنۍ یوازینۍ پاتې کس د عدالت غوښتنه کوي.
د قرباني شوې کورنۍ یوازنی پاتې شوی غړی نور اسلم وايي: « د پاکستان له دې جابر او ظالم حکومت سره باید داسې کار وشي چې بیا پر پښتنو د ظلم جرئت ونه کړي. پر دوی باید د نړۍ له خوا بندیزونه ولګول شي.»
نوراسلم په متحده عربي اماراتو کې له تېرو شپږو کالونو راهیسې مسافر و چې په خبره يې مسافري او مزدوري یې د همدې کورنۍ لپاره کوله، خو د کورنۍ غړي او هیلې ترې د پاکستان پوځي رژیم هوايي برید واخیستې.
نور اسلم وايي: « زه د دې لپاره مسافر وم چې دوی وږي پاتې نه شي، دوی ښې جامې او خواړه ولري. کله چې راغلم، ما خپل بچۍ او کورنۍ ونه لیدل.»
ځایي چارواکي او د خوست اوسېدونکي وایي، د پاکستان پوځي رژیم تل د اسلامي او انساني اصولو خلاف په بیا بیا د افغانستان په خاوره کې عام وګړي په نښه کړي دي. دوی د پاکستان له عام ولس او نړیوالې ټولنې غواړي چې د دې ډول بریدونو د مخنیوي لپاره دې عملاً سخت او جدي ګامونه واخلي.
خوست والي عبدالله مختار وايي: « د پاکستان مسلمان او دیندار ولسه! دا حکومت له خپلې خاورې ورکړی، ځکه د ټولې نړۍ لپاره یې درد سر پیدا کړی.»
ځایي اوسېدونکی حاجي عالم الدین وايي: « اوس یې که څوک مني که نه، موږ په خپلو سترګو ولیدل چې ډورن د پاکستان له خوا راغله، بمبار یې وکړ او بېرته پاکستان ته لاړه.»
ځايي اوسېدونکی نور جباز خان وايي: « زه په لر او برو پښتنو غږ کوم چې د پاکستان په ضد سره یو لاس شي، کنه هېڅوک به روغ پاتې نه شي.»
ځايي اوسېدونکی عبدالحلیم وايي: « زه نه پوهېږم چې د نړیوالو په پاکستان زور نه رسېږي که په دې کارونو کې ورسره موافق دي. دوی لوی ظم وشو، خو نړۍ چوپه خوله ده.»
د نومبر په ۲۵مه، د شپې شاوخوا دولس بجې د خوست د ګربزو ولسوالۍ جګ مغلګي سیمه کې د یوه هوايي برید پرمهال د یوې کورنۍ لس غړي چې یوه ښځه او نهه ماشومان په کې شامل و، شهیدان شول.
دا پیښه په کور دننه او بهر له پراخ غبرګون سره مخ شوه چې د ملګرو ملتونو په شمول، ټولو بنسټونو او هېوادونو د پاکستان پوځي رژیم له لوري د ملکیانو په نښه کول د نړیوالو قوانینو خلاف وبلل.
