ولسمشر غني ویلي، د پاکستان لخوا د ملا برادر خوشې کول د سولې ملاتړ په مانا نه دي.
د پاکستان لخوا د ملا عبدالغني برادر خوشې کول دا مانا نه لري چې ګواکې اسلام اباد د افغانستان د سولې د بهیر ملاتړ کوي.
ولسمشر محمد اشرف غني د مونیخ نړیوال امنیتي کنفرانس ته په وینا کې ویلي، پاکستان باید پر دوو مهمو مسئلو خبرې ورسره وکړي او هغه دا چې د ترهګرو ملاتړ به دروي او د سیمه ییز امنیت لپاره به ګډه هوکړه ورسره کوي.
غني وویل: “پرېکړه لا هم پاکستان ته پاتې ده، د ملاعبدالغني برادر خوشې کول د سولې د بهیر د ملاتړ مانا نه لري، هغه یو فرد دی، موږ صادقانه بحث غواړو چې دوه اړخه لري، یو د طالبانو د پناه ځایونو بندول او دوهم د سیمېز امنیت لپاره ګډ تفاهم.
ولسمشر غني همدا راز ټینګار وکړ، یوازې دا هم کافي نه ده چې طالبان ځان په رسمیاتو کې له القاعده جلا کړي، بلکه ډېره مهمه ده چې دا ډله له ټولو وسله والو ډلو چې د افغانستان هر ګاونډي او نړیوال قدرت ته ګواښ پېښوي لرې شي.
