غزنی یو له هغو ولایتونو دی چې له تېرو ۲ لسیزو راهیسې د نورو ولایتونو په پرتله د پراختیایي پروژ د عملي کولو په برخه کې ورته لږه پاملرنه شوې.
که څه هم د اسلامي امارت له واکمنېدو راهیسې په ټول هېواد کې پراختیایي پروژې په چټکۍ سره عملي کیږي، خو د دې ولایت ناوه ولسوالي چې له غزني ښاره شاوخوا ۱۷۰ کیلومټره واټن لري، د اوبو له سخت کمښت سره مخ ده او اوسېدونکي یې پاکو اوبو ته لاسرسي نه لرلو شکایت کوي.
قومي مشر دلاور ترکی وايي: « زموږ کلي د اوبو نه شتون له مشکل سره مخ دي او په ټوله سیمه کې د څښاک اوبه نه پیدا کېږي. زموږ په سیمه کې د اوبو ۳ ژورې برمې دي چې د هغو اوبه هم د څښاک لپاره مناسبې نه دي. زموږ غوښتنه دا ده چې موږ ته د پاکو اوبو زمینه برابره شي. په ځانګړې توګه د ژمي او ورښتونو پرمهال د اوبو له سختو ستونزو سره مخ یو.»
د فیض اباد، نواب خېل، سلام خېل او انګړ کليو اوسېدونکي وایي، په دې کلیو کې د پاکو اوبو څاه ګان شته، خو اوبه یې تروې دي. د دوی په خبره، هره ورځ څو کیلومټره مزل کوي، ترڅو د څښاک پاکې اوبه د مرکبونو یا زرنج وسایطو په واسطه خپلو کورونو ته راوړي.
د سیمې یوتن اوسېدونکی وايي: « دلته د اوبو کچه ۱۵۰ متره ژوره ده او هغه اوبه هم ډېرې خرابې دي. ډاکټران وايي، زموږ ګڼو کسانو ته د اوبو له امله ناروغۍ ور پیدا شوې دي.»
د سیمې یو بل اوسېدونکی وايي: « موږ په ټول کلي کې اوبه نه لرو، دا یوه د مسجد څاه ده چې یوازې څو بوشکې اوبه ورکوي او بیا وچېږي. موږ له څلور کیلومټره لرې ځایه اوبه راوړو.»
د دې سیمې د خلکو په خبره، د پاکو اوبو نه شتون له امله ځینې ناروغۍ خپرې شوې او کله چې ډاکټرانو ته مراجعه کوي، د ناروغیو اصلي لامل یې ناپاکې اوبه بولي.
قومي مشر دلاور ترکی وايي: « د چټلو اوبو له امله ناروغۍ زیاتې شوې دي. موږ غوښتنه کوو چې ژر ترژه زموږ د اوبو غم وخوړل شي.»
بله خوا، د غزني د کلیو او پراختیا رییس هم دا ستونزه مني او وایي، له نورو کلیو سربېره یاد کلي د اوبو له شدید کمښت سره مخ دي او په خبره یې، په پلان کې لري چې له هرې ممکنې لارې دې ستونزې ته رسېدنه وکړي.
د غزني د کلیو او پراختیا رییس مولوي محمد قاسم امیني وايي: « موږ له دې ستونزې خبر یو او پوهېږو چې د غزني اکثریت سیمې د اوبو ستونزه لري. دا سیمه زموږ په لېست کې ده او هڅه کوو د اوبو لپاره یې ترتیب جوړ کړو.»
د غزني ولایت د ناوې ولسوالۍ اوسېدونکي داسې مهال پاکو اوبو ته د لاسرسي له نه لرلو شکایت کوي چې د کلیو بیا رغونې او پراختیا وزارت د وروستیو شمېرو له مخې، روان کال په ټول هېواد کې د څښاک پاکو اوبو شاوخوا ۸۵ شبکې فعالې شوې دي چې د اټکل له مخې، شاوخوا ۱۵۰ زره کسانو ته به د څښاک پاکو اوبو لاسرسی برابر کړي.
