د دوحې فورم، چې د شنبې په ورځ پيل شوی دويمه ورځ يې د ځانګړي پنل له لوري د افغانستان پر اړوند مسايلو او په ځانګړې توګه په سيمهييز اتصال یا نښلون کې د افغانستان نقش پر سر بحث ته ځانګړې شوې وه.
چارواکي دغو بحثونو ته په پام وایي، چې د افغانستان په اړه پخواني امنیتي او د کړکېچ لېد په تدریجي ډول د نښلون، پراختیا او اقتصادي ودې پر نوي روایت بدلېږي.
د بهرنیو چارو وزارت درېیم سیاسي ریيس ذاکر جلالي وايي: «د قطر په منځگړيتوب او شخړو سولهييز حل يوه بريالۍ بېلگه افغانستان دی. دا چې اوس دوحې فورم د سيمهييز نښلون په چوکاټ کې د افغانستان پر رول بحث کوي، څرگندوي چې دغه بدلون له افغانستان او ټولې سيمې لپاره د يوه نوي فرصت دروازه پرانيزي. هغه فرصت چې ورسره تعامل ځیرتیا، ژورتيا او لرلید غواړي.»
د دوحې په سږني فورم کې له ۱۵۰ هېوادونو او سازمانونو شاوخوا ۵ زره کسانو ګډون کړی چې په کې د افغانستان بهرنيو چارو وزارت پلاوی هم شامل دی.
څارونکي د دوحې فورم په څېر ناستې د افغانستان او نړۍ ترمنځ د سیاسي تعامل لپاره مهمې بولي او په خبره یې دغه ډول ناستې کولای شي د افغانستان او نړۍ ترمنځ سیاسي تعامل پراخ او نږدې کړي.
د سیاسي چارو شنونکی شهسوار سنګروال وايي: « هره ناسته د افغانستان لپاره ځانګړی ارزښت لري، خصوصا په قطر کې چې کومه ناسته د ۲۳ م فورم په درشل کې جوړېږي، دا ځانګړی ارزښت ځکه لري چې قطر له افغانستان سره او له افغان ولس سره او له اسلامي امارت سره نږدې اړیکې لري.»
ځینې نور شنونکي بیا وایي اسلامي امارت ته هم پکار ده چې له دغه ډول نړیوالو ناستو په ګټنې په نړیوال سیاسي ډګر کې سترې موخې ترلاسه کړي.
د سیاسي چارو شنونکي محمد اسماعیل ځدراڼ په دې اړه داسې وايي: « دغه هېوادونه دې له افغانستان سره ښې او سالمې اړیکې رامنځته کړي، د رسمیاتو لپاره کار وکړي، دغه کړۍ یې چې پر افغانستان راتنګه کړې ده، تنګ نظري ونکړي او په رسمیت یې وپېژني.»
د دوحې فورم ناستې لومړۍ ورځ ټول بحثونه او خبرې په سیمه او نړۍ کې پر روانو سیاسي مسایلو ورټولې وې، په فلسطین کې له غزې نیولې تر اوکراین جګړې، سوډان او سوریې پورې هغه مسایل وو، چې د نړۍ ګڼ شمېر مشرانو پرې خبرې او بحثونه وکړل.
