د خوست ولایت ځاځي میدان ولسوالۍ اړوند الګډې سیمه، چې نږدې ۵۰ زره نفوس لري اوسیدونکي یې وایي، د ژوند د نیمګړو او اساسي اړتیاوو ته د نه لاس رسي له امله سختو ستونزو سره مخ دي.
د ځاځي میدان والسوالۍ یو تن اوسېدونکی وايي:« لویه ستونزه مو د کلېنیک دی. ډاکټران نه لرو، ښځېنه ډاکټرې نه لرو. دوا مو کمه ده، دا ستونزې مو بیخي زیاتې دي. بله د مخابراتو ستونزه ده.»
د ځاځي میدان والسوالۍ یو بل اوسېدونکی قلم خان معصوم وايي:« موږ ته لومړی باید سړک جوړ شي. دویم کلېنیک دی، چې کوچنی دی. »
ځایي اوسیدونکي له دې سربیره چې د روغتیا، پوهنې او بیارغونې په برخه کې د سرپرست حکومت پر پاملرنې ټینګار کوي، ترڅنګ یې دغلته د وچکالۍ د مخنیوي او کرنې د ودې په برخه کې سرپرست حکومت د بندونو جوړیدو ته هم را بولي، څو د همدې سیمې خلک له شته ستونزو خوندي شي
د ځاځي میدان والسوالۍ یو تن اوسېدونکی غازي محمد وايي:« زموږ زده کوونکي د سر پناه لپاره مناسب ټولګي نه لري. په باراني وخت کې زموږ زده کوونکي تر شنه اسمان لاندې ناست وي.»
د ځاځي میدان والسوالۍ یو بل اوسېدونکی جان محمد وايي:« کله چې کلېنیک ته خلک ورځي، ځېنې داسې خلک هم وي، چې بېرته له همغې ناروغۍ سره کورته ستانه کېږي. نو کلېنیک کوچنی دی، ډاکټر یو دی، د دې سیمې لپاره بسنه نه کوي.»
ورته مهال د دغه ولایت ځایي چارواکي که څه هم په لرو پرتو سیمو کې د خلکو ستونزې مني، خو ډاډ ورکوي چې سرپرست حکومت په یاده برخه کې خپل فعالیتونه چټک کړي او د لرو پرتو سیمو خلکو اساسي ستونزو ته به په دومدار او منظمه بڼه رسېدنه وکړي.
د خوست اطلاعاتو او کلتور رییس شبیر احمد عثماني وايي:« د تعلیم او تربیې په برخه کې، د صحت په برخه کې او همدغه راز د دوی د لارو جوړولو په برخه کې د ځېنې انکشافي پروژو پلې کولو په برخه کې اسلامي امارت ځېنې پلانونه نیولي او ځېنې یې عملي کړي.»
په خوست ولایت کې د لرو پرتو سیمو خلک چې لا هم له ګڼو ستونزو سره مخ دي، له سرپرست حکومته غوښتنه کوي چې د بېلابېلو رغنیزو پروژو له لارې یې د ژوند اساسي ستونزو ته جدي او ژر پاملرنه وکړي.
