د افغان خبریالانوخوندیتوب کمېټې مسوولین په خوست ولایت کې له خبریالانو سره ناسته کې ټینګار کوي چې اطلاعاتو ته د لاس رسي په برخه کې دې یو منظم او واحد مکانېزم رامنځته شي، ترڅو له مخې يې رسنیز فعالیتونه لا اغېزناک او معیاري شي.
دوی که څه هم دې په دې برخه کې د ستونزو هواري ته هیله من دي او د اسلامي امارت له راتګ وروسته په هېواد کې د ۱۸۰ نویو رسنیو له فعالیت پیل کېدو سربېره زیاتوي، ګڼې رسنۍ له سختو اقتصادي ستونزو سره مخ دي او د دوام لپاره یې جدي ملاتړ ته اړتیا لري.
د افغان خبریالانو د خوندېتوب کمیټې مشر جمیل وقار وايي: « دا ښکاره خبره ده چې ستونزې زیاتې دي. که دا اقتصادي اړخ وي یا اطلاعاتو ته لاسرسی یا هم په ځینو برخو کې د قوانینو نه شتوالی. دغه راز، خبریالان د ظرفیت لوړولو ته هم اړتیا لري.»
اخوا سیمه ییز مسوولین ډاډ ورکوي چې د خبریالانو او رسنیو د ستونزو هوارولو ته ژمن دي. د دوی په خبره، په خوست کې د امارت له راتګ وروسته څو نوي رسنیز ادرسونه هم فعال شوي او د خبریالانو پر وړاندې هم د ستونزو جدي قضیې نه لري.
د خوست اطلاعاتو او فرهنګ رییس شاه حسین مسجدي وايي: « خبریالان او ژورنالېسان د ملت سترګې او غوږونه دي. دوی چې کوم څه په سترګو ګوري، د ملت تر غوږونو یې رسوي.»
د خوست امربالمعروف ریاست استازی مفتي عبدالله ابدالي وايي: « د امربالمعروف اداره له رسنیو سره ډېره نږدې پاتې شوې، که چېرې دوی ته د اصلاح لپاره کومه خبره شوې وي او دوی پرې پوه شوي نه وي، اوس اقرار کوي چې دا خبره زموږ په ګټه وه.»
په همدې ناسته کې ځایي خبریالانو له حکومتي مسوولینو او اړوند بنسټونو غوښتي چې د خبریالانو او رسنیو ملاتړ وکړي او د اقتصادي ستونزو د حل لپاره د نړیوالو مرستندویو بنسټونو پام را واړوي.
