د بهرنیو چارو نوی سیاسي مرستیال او سرپرست وزیر رسماً معرفي شو.
محمد هارون چخانسوري دوه ورځې وړاندې د ولسمشر غني د حکم پر اساس د بهرنیو چارو وزارت سیاسي مرستیال او سرپرست وزیر په توګه وګمارل شو چې نن یې رسماً کار پیل کړ.
چخانسوري د کابینې او ملي شورا د یو شمېر غړو په حضور کې د ولسمشر دویم مرستیال سرور دانش لخوا رسما معرفي او دنده یې پیل کړه.
په دغو مراسمو کې چې مخکیني سرپرست وزیر ادریس زمان هم ګډون کړی و چخانسوري ته یې په چارو کې د بریالیتوب هېله وښوده او په دغه وزارت کې یې د اصلاحاتو بسته چې له وړاندې ترتیب شوې ده خبرې وکړې.
چخانسوري به د نوي وزیر تر ټاکل کېدو د یاد وزارت سرپرستي کوي او د سیاسي مرستیال اړونده چارې به هم سمبالوي.
