Skip to content
د بلخ ولایت د صنعت سوداګرۍ خونې مرستیال محمد احسن انصاري وايي، د بانکي سيستم د نه فعالېدو او د خامو موادو نه شتون د دې لامل شوی، چې يو شمېر کارخونې پر ټپه ودرېږي.
انصاري وايي، هېله من دی،چې هېواد ته د خامو موادو په واردولو سره به يادې فابريکې بېرته فعالیت پيل کړي.
انصاري زیاتوي: «تر څو چې موږ خام مواد وارد نه کړو، نو ښکاره خبره ده چې زموږ د کارخونو فعاليتونه ځنډېږي. هيله مندي شته چې د خامو موادو په واردولو سره به د داخلي توليدي کارخونو فعاليتونه بېرته پيل شي.»
په ورته مهال انصاري وايي، د حيرتان بندر له لارې د هغو ۴۰۰ کانتينره توکو واردات پيل شوي دي، چې وړاندې تر دې د ازبکستان په ترمذ ښار کې درول شوي ول.
انصاري زیاته کړه: «څه باندې ۴۰۰ واګونه خوراکي او غير خوراکي توکي له پولې اخوا په ترمذ ښار کې متوقف وو، له تېرو درې ورځو راهیسې د دغو موادو واردات پيل شوي، چې په راتلو سره به يې بازار کې د توکو نرخونه هم کښته شي.»
له دې سره مزارشریف کې يو شمېر سوداګر غوښتنه کوي چې ژر تر ژره دې نوی حکومت اعلان شي، ترڅو د بانکي خدمتونو په پيل کېدو سره بېرته د خلکو کاروبار عادي حالت ته وګرځي.
هټیوال عبدالله وايي: «کله چې توليدات نه وي او کارخونې ولاړې وي، نو دا خو د خلکو په زيان تمامېږي. دوی دې همکاري وکړي، چې دا کارخونې بېرته فعاله شي.»
هټیوال محمد نعيم وايي: «له کله چې دا تحولات راغلل، د ټولو کارخونو چارې ځنډېدلې دي، خو يوه هېله شته چې امنيتي وضعيت ښه شوی او تمه ده چې ژر به کارخونې بېرته فعاليت پيل کړي.»
شمال زون کې د طالبانو د فرهنګي کمېسيون مسوول ذبیح الله نوراني بيا وايي، مزارشریف ښار کې سوداګريزه راکړه ورکړه د عادي کېدو لور ته روانه ده.
نوراني زیاته کړه: «په مزارشريف ښار کې اوس وضعيت ډېر ښه دی. ټولې هټۍ او مارکيټونه د خلکو پر مخ خلاص دي، امنيت تامين دی او د چا سر او مال ته هېڅ ډول زيان نه رسېږي.»
له بلخ اخوا په يو شمېر نورو شمالي ولايتونو کې هم سوداګر تائيدوي چې ځيني توليدي کارخونې له فعاليته لوېدلې دي.
