د هلمند ولایت د اطلاعاتو او فرهنګ ریاست چارواکي وايي، په بست تاریخي کلا کې یې د ابن حبان البستي په نوم عامه کتابتون جوړ کړی.
دوی زیاتوي، په دې کتابتون کې ۳ زره ټوکه بېلابېل کتابونه شته چې د یادې کلا د تاریخ او اهمیت په اړه لیکل شوي کتابونه هم په کې شامل دي.
د دوی په خبره، ډېری سیلانیان به د دغې کلا د لیدنې پرمهال د هغې تاریخي ارزښت په اړه نه پوهېدل، خو اوس به يي د دغو تاریخې کتابونو د مطالعې له لاري پوهاوی زیات شي.
بست کلا کتابتون مسوول تازه ګل همت وايي:« په دې کتابتون کې شاوخوا ۳ زره ټوکه کتابونه شته. دلته هره ورځ خلک راځي او د کتابونو مطالعه کوي.»
دلته راغلي سیلانیان هم د دې ګام ستاینه کوي او دغه کار د بست کلا په تاریخي ارزښت پېژندلو کې مهم ګڼي.
دوی غوښتنه کوي چې د کتابتون لپاره دې اساسي ودانۍ جوړه او دغه راز دې د بست کلا بیارغولو ته جدي پاملرنه وشي.
بست کلا ته په سیل راغلی نعمت الله وايي: « موږ د دې کتابتون له جوړېدو ډېر خوښ یو. په دې کتابتون کې داسې کتابونه هم شته چې د بست کلا د تاریخ په اړه مالومات لري. موږ غوښتنه کوو چې د بست کلا پاتې کارونه بشپړشي.»
یو بل سیلاني صدیق الله همت وايي: « په دې کې د بست کلا د تاریخ په اړه یو شمېر کتابونه شته. دا کتابتون اوس په یوه کانټینر کې جوړ شوی، موږ له حکومت غوښتنه کوو چې سمه ودانۍ ورته جوړه کړي.»
دهلمند د اطلاعاتو او فرهنګ ریاست مسوولین وايي، د بست کلا د رغولو لپاره سروې ترسره شوې او هیله لري چې راتلونکي مالي کال کې به یې د رغولو چاري پیل شي.
د هلمند اطلاعاتو او فرهنګ ریاست کې د فرهنګ او ګرځندوی آمر سلطان محمد حنیف وايي:« په بست تاریخي کلا کې مو د ابن حبان بستي په نوم کتابتون جوړ کړی. موږ دا منو چې ځای یې تنګ دی، خو هڅه کوو چې ساحه یې پراخه کړو او نور وسایل هم ور ولېږدوو. همدارنګه هغه اسانتیاوې برابرې کړو چې مطالعه کوونکي ورته اړتیا لري. د بست تاریخي کلا د بیارغولو او ترمیم سروې شوې او موږ هیله لرو په را روان مالي کال کې د اسلامي امارت په بودیجه د دې کلا ویجاړې شوې برخې بېرته ورغول شي.»
د هلمند د اطلاعاتو او فرهنګ ریاست د مسوولینو د مالوماتو پر بنسټ، روان کال یې په بست کلا کې د ابن حبان بستې کتابتون ترڅنګ په ګرېشک او سنګین ولسوالیو کې هم عامه کتابتونونه جوړ کړې دي.
