Skip to content
د بحران مخنیوي نړیوالې ډلې د افغانستان اقتصادي وضعيت په تړاو راپور خپور کړی،چې په کې د هغو ستونزو، ننګونو او لاملونو یادونه شوې،چې له امله یې میلیونونه افغانان له ناورین سره مخ دي.
راپور کې همدا راز د روان وضعیت د مهار لپاره ځینې غوښتنې هم مطرحه شوي دي.
د بحران ډلې دافغانستان مالي سکتور فلج یاد کړی او ویلي یې دي،چې خلکو ته آن لومړني خدمات نه وړاندې کېږي.
د بحران مخنیوي نړیواله ډلې د راپور یوه برخه:« افغان دولت د سقوط پر څنډو ولاړ دی،نړۍ د طالبانو واک ته رسېدو ته د دولتي شتمنیو په کنګل کولو، د مرستو کمولو او یوازې د بشري موخو لپاره د محدودو بندیزونو په لرې کولو سره ځواب ورکړ. دولتي کارکوونکي تنخواوې نه لري، لومړني خدمات نه وړاندې کېږي او مالي سکتور فلج شوی دی.»
یادې ډلې په خپل راپور کې امریکا ته د وړاندیز په توګه ویلي،کنګل شوې پیسې باید په تدریجي ډول ازاد شي او یوه برخه یې په ازمایښتي ډول افغان حکومت ته په واک کې ورکړي.
د بحران مخنیوي نړیوالې ډلې د راپور یوه برخه:« تر ټولو ښه به دا وي،چې واشنګټن د افغانستان مرکزي بانک (دا افغانستان بانک) ته د کنګل شويو زیرمو د تدریجي بېرته ورګرځولو په برخه کې ګام پورته کړي او د بدو پایلو د مخنیوي لپاره د دې پیسو یوه برخه ازاده کړي.»
اخوا د سیاسي چارو یو شمېر تحلیل کوونکي که څه هم د روان ناورین مخنیوی د نړیوالې ټولنې مسوولیت بولي،خو زیات باور نه لري چې امریکا دې نږدې ۱۰ میلیارده کنګل کړې پانګې یوه برخه اسلامي امارت ته په واک کې ورکړي.
د بحران نړیواله ډله ځکه د افغان دولت پر ملاتړ ټينګار کوي،چې د ژمي له رارسیدو سره د میلیونونو افغانانو برخلیک د حکومت بقا پورې تړلی بولي.
په ورته مهال د ملګرو ملتونو د ماشومانو ملاتړې ادارې یا یونېسف هم په افغانستان کې د بحران مخنیوي لپاره له ۲۴ میلیونه افغانانو سره چې نژدې نیمايي یې ماشومان دي، د ۲ میلیارده ډالرو بشري مرستو غوښتنه کړې او هېله یې ښودلې ده،چې دغه مرستې به د میلیونونه افغانانو ژوند وژغوري.
