له افغانستان د امریکایي ځواکونو د وتلو لړۍ په مشروط ډول پیل شوه.
امریکایي ځواکونو ویلي، له افغان حکومت سره د ګډې اعلامیې او د طالبانو سره د موافقې په اساس یې له دغه هېواده د خپلو ځواکونو کمول پیل کړي دي.
امریکایي ځواکونو دا نه دي ویلي چې د ځواکونو کمولو لړې کله پیل شوې او تر اوسه څومره عسکر وتلي دي.
د مالوماتو له مخې، اوسمهال افغانستان کې شاوخوا ۱۳۰۰۰ امریکايي سرتېري دي چې تر څلورنیمو میاشتو وروسته به دغه شمېر ۸۶۰۰ ته راکم شي.
تېره ورځ د امریکایي ځواکونو ویاند سوني لېګیټ په یوه اعلامیه کې لیکلي، امریکايي ځواکونه د خپلو موخو د ترلاسه کولو لپاره ټول امکانات او صلاحیتونه په واک کې لري.
له افغانستانه د امریکايي ځواکونو د وتلو موضوع له طالبانو سره د موافقې مهم شرط و، خو امریکایي ځواکونه وايي که طالبان په خپلو ژمنو وفا ونکړي، دا تړون ماتېدلی شي.
اخوا ټاکل شوې چې نن سې شنبه به ولسمشر محمد اشرف غني د طالب بندیانو د خوشې کولو په اړه یو فرمان صادر کړي.
تېره ورځ ولسمشر غني د لوړې له مراسمو وروسته د وینا پر مهال وویل، د طالب بندیانو د خوشې کېدو په تړاو به سبا ته یو فرمان ورکړي.
اشرف غني وویل، یو فرمان به صادر کړي چې جزیات به هم په کې شامل وي او په وینا یې یوې داسې تګلارې ته رسېدلی چې د بندیانو د خوشې کېدو بدل کې به تاوتریخوالي کې د پام وړ کموالی راځي او خلکو ته به یې ګټې او اغېز محسوس وي.
له دې سره ټاکل شوې وه چې نن د طالبانو او افغان پلاوي ترمنځ بین الافغاني مذاکمرات پیل شوي وای، خو تیره ورځ ولسمشر غني وویل چې تر سې شنبې به له طالبانو سره د مرکچي پلاوي نوملړ بشپړ شي.
