د کانونو او پټروليم وزارت مخکينی سرپرست شهاب الدین دلاورچي اوس د افغاني سرې میاشتې د سرپرست رئیس په توګه ټاکل شوی، د يو لړ مراسمو په لړ کې خپله نوې دنده پيل کړه.
د چارو ادارې مشر نورالحق انور وايي، يو شمېر بهر مېشتې د نورو په لمسون د سرپرست حکومت د تخریب او بدنامۍ هڅې کوي؛ خو په خبره يې حکومت اوس د نړیوالو په شمول د افغانانو د قناعت وړ ګرځېدلی.
انور زیاتوۍ: « هغه دوښمنان چې ان دروبینونه یې اچولي څو یوه ذره نیمګړتیا او ستونزه راپیدا کړي او بیا یې نړیوالو ته وښيي؛ خو سره له ډېرو هڅو داسې څه یې مخې ته نه دي راغلي.»
ورته مهال د افغاني سرې میاشتې مخکېنی سرپرست وايي، دغه اداره یوه بې طرفه اداره ده او په هېڅ ارګان پورې تړاو نه لري.
مطیع الله خالص له نړیوالو غوښتنه کوي، چې له یادې ادارې سره بشري مرستې ونه دروي.
خالص زیاتوي: « تر هغې چې دغسې ټولنې خپل استقلالیت ولري او په بې طرفۍ سره خپل خدمات وړاندې کړي، په نړۍ کې باور ترلاسه کولی شي او د افغانستان په موجوده حالاتو کې د نړۍ مرستې خپل دې غمځپلي ملت ته په ډېرې اسانۍ سره راجلبولی شي.»
شهاب الدین دلاور، چي اوس يي د یادې ادارې د سرپرست په توګه دنده پیل کړه وايي، په دولتې ادارو کې باید چارې د روابطو په اساس نه بلکي اهل کسانو ته وسپارل شي.
نوموړی وايي، دا چي د حکومت ټول غړي صادق کسان دي نو له همدي امله اسلامې امارت په نړۍ کې ساری نه لري
دلاور زیاتوي: « څوک چې د مسلمانانو په چارو مقرر شو او دی بیا په هغه کې داسې تصرفات او توضیفات کوي چې بل تر هغې بهتره وي خو دی د خپلوۍ او قومیت له مخې یو بل مقرروي؛ نو دا په دې مانا چې اهل پرېږدي او نا اهل مقرروې او په دې پوهېږي هم چې دا اهل او دا نااهل دی؛ نو دې له الله سره خیانت وکړ او د ځمکې په سر د الله نظام په همدې خرابېږي.»
دلاور وايي، افغانان له زیاتو اقتصادي ستوتزو سره مخ دي او هڅه به وکړي چي نړیوالې مرستي را جذب او اړمنو افغانانو ته يې پر وخت ورسوي.
