Skip to content
د ژمنو کنفرانس په نوم د افغانستان په تړاو د ملګرو ملتونو کنفرانس د پنج شنبې په ورځ د «۱۴۰۱ د وري پر ۱۱مه» پر لیکه د سویس پلازمینه جنیوا کې ترسره شو،چې کوربانه یې بریټانیا، جرمني او قطر ول.
د دغه کنفرانس موخه د هغو ۴ اعشاریه ۴ میلیارده ډالرو راټولول و،چې ملګرو ملتونو یې د افغانستان بشري وضیعت مهار لپاره غوښتنه کړه وه،خو په کنفرانس کې یوازې ۲ اعشاریه ۴۴ میلیارده ډالر راټول شول.
د امریکا له خوا په دې کنفرانس کې ملګرو ملتونو کې د دغه هېواد دایمې استازې لنډا تومس ګډون کړی و،چې له افغانستان سره یې د ۲۴۰ میلیونه ډالرو مرسته اعلان کړه.
تومس زیاتوي:« موږ اوریدلي،چې افغانان لا هم ډېرې اړتیاوې لري. په همدې موخه امریکا له افغانستان سره د ۲۴۰ میلیونه ډالرو مرسته اعلانوي،چې د ملګرو ملتونو ادارو او ان جیو ګانو له خوا به په افغانستان کې دننه او سیمه کې افغانانو ته ورسول شي.»
تومس ویلي،د افغانستان خلکو ترڅنګ ولاړ دي،خو مرسته شوې پیسې به د اسلامي امارت لاس ته نه ورځي.
هغې افغانستان کې نجونو پر منځنیو ښوونځیو او لیسو بندیز په اړه هم ویلي چې باید بیرته پرانیستل شي ځکه که د یوې ټولنې نیمایي وګړي لیک او لوست ونشي کولی پرمختګ یې ناشونی دی.
له افغانستان سره نورې اعلان شوې مرستې په دې ډول وې.
افغانستان سره اعلان شوې مرستې:«اروپایي ټولنې او غړو هېوادونو ۲۸۵ میلیون ډالره مرسته، جرمني ۲۰۰ میلیونه یورو اضافي مرسته، ترکیې د ۵ میلیونو ډالرو مرسته او بریتانیا له کنفرانس یوه ورځ مخکې ۳۸۰ میلیونه ډالرو مرسته اعلان کړه،چې نیمایي به یې افغان ښځو او نجونو ته ځانګړې کیږي.»
د ملګرو ملتونو عمومي مشر انټونیو ګوترس په دې کنفرانس کې وویل،د نړۍ ۴۰ هېوادونو افغانستان پرېښود او اوس یې وخت دی،چې د خپلې دې پریکړې جبران وکړي او دا هېواد هېر نه کړي.
ګوترس وویل،افغانستان کې دا مهال ۹۵ سلنه خلک کافي خواړه نه لري،په داسې حال کې چې ۹ میلیونه نور له سختې لوږې سره مخ دي.
هغه ټینګار کړی دی،چې د افغانستان روان وضیعت د مهار لپاره تر ټولو اړین ګام دا دی، چې د اقتصادي راپرځېدا مخه ونیول شي.
