Skip to content
د افغانستان اسلامي امارت د اميرالمومنين ملا هیبت االله اخوند په یوه فرمان کې په ټول هېواد کې د کوکنارو کښت او ورسره د هر ډول نشه يي توکو تجارت، تولید، صادرات او واردات په کلکه منع اعلان کړل.
دغه فرمان کې خبرداری ورکړل شوی،چې هر څوک له دغې پرېکړې سرغړونه وکړي، له قانوني چلن سره به مخ شي.
د اسلامي امارت ویاند ذبیح الله مجاهد وايي:« ټولو هېوادوالو ته خبر ورکول کېږي،چې د دغه فرمان د صدور له نیټې وروسته،په افغانستان کې د کوکنارو کښت په مطلق ډول منع دی. له دې وروسته به هېڅ څوک پر خپل ځمکو کوکنار نه کري. که هرچا کوکنار وکرل،نو کښت به یې له منځه وړل کېږي او خپله به له شرعي چلن سره مخ کېږي. همدرانګه په ټول هېواد کې د نشه يي توکو ټولو ډولونو لکه، شراب، هیروین، شیشه،تابلیت کا، چرس او د نورو ټولو نه شه کوونکو شیانو استعمال،لېږد، پلور،تجارت، واردات، صادرات او د نشه يي توکو د تولېد کارخونې ممنوع دي. »
د رئیس الوزراء مرستیال ملا عبدالسلام حنفي بيا وايي، هېواد کې د ۳،۵ ميلیونه روږدو لامل د نشه يي توکو زيات تولید دی او اسلامي امارت به په پراخه کچه له نشه یي توکو سره مبارزه وکړي.
حنفي زیاتوي:«ا.ا د یوه مسوول دولت په توګه پرېکړه کړې،چې سر له ننه په هېواد کې د هر ډول نشه يي توکو کښت منعه دي. د نشه يي توکو قاچاق، پروسېس او استعمال په کلکه منعه شوي او هر څوک چې په دې تړاو ونیول شي،د شرعي قانون منګولو ته سپارل کېږي.»
بل لور ته بيا نشه يي توکو سره د مبارزې سلاکار معین ملا عبدالحق همکار وايي، پلان لري،چې کابل کې د روږدو کسانو لپاره ۳۰ زره بستريز روغتون جوړ کړي،چې د هېواد پر کچه په کې د روږدو درملنه وکړي.
همکار زیاتوي:« همدارنګه موږ اوس د پل چرخي سیمه کې پر یوه کمپلکس کار شروع کړی دی. په دې کمپلکس کې به ۳۰ زره روږدي کسان ځای پر ځای کېږي. موږ اوس یوه لویه ستونزه دا لرله،چې ځای مو نه درلود. موږ غوښتل،چې ټول روږدي کسان راټول کړو، خو متاسفانه دومره لوی ځایونه مو نه درلودل. دومره لوی روغتونونه نه ول،چې موږ ټول هلته ځای پر ځای کړو. خو د اوس لپاره کار پیل شوی، انشاء الله په راتلوونکې کې به موږ دغه کمپلکس فعاله کوو.»
په دغه غونډه کې د اسلامي امارت له لوړ پوړومشرانو سربېره د اروپايي ټولنې سرپرست سفیر، د يو شمېر هېوادونو ډيپلوماټانو او نړیوالو بنسټونو استازو ګډون کړی و.
د اسلامي امارت چارواکو له بهرنیو استازو وغوښتل،چې د نشه يي توکو د مخنیوي په برخه کې ورسره همکاري وکړي.
