د افغان سولې لپاره د امریکا متحده ایالتو بهرنیو چارو وزارت پخوانی ځانګړی استازی زلمی خلیلزاد د اسلام اباد په امنیتي ناسته کې ویلي، اسلامي امارت د اوسني حکومت په سیاسيجوړښت کې د دوحې په هوکړه عمل نه دی کړی.
خلیل زاد وایي،له افغانستانه د امریکايي ځواکونو وتل مثبت او منفي اړخونه لري، چې پر وینا یې موږ ټول په کې ښکېل یوو.
په ورته وخت کې هغه وایي،مثبت اړخونه یې دا دي،چې په دغه هېواد کې جګړه پای ته ورسېده او داسې یو حکومت شته دی،چې ټول افغانستان اداره کوي، خو منفي اړخونه یې د یوه مشروع حکومت نه رامنځته کېدل دي او د افغانانو تر منځ د خبرو له لارې باید یو ټول ګډونه حکومت رامنځته شوی وای،چې داسې ونه شول.
له دې سره سم، د پاکستان لوی درستیز په دې غونډه کې په افغانستان کې د سرپرست حکومت فعالیتونه د قناعت وړ نه ګڼي او وايي، که چېرې د افغانستان وضعیت ته رسېدنه ونه شي، نو د ده په باور دغه هېواد به یو ځل بیا د ترهګرو پر ځاله بدل شي.
