د امریکا ځانګړی استازی زلمی خلیلزاد چې تازه کابل ته راغلی وايي، د سولې تاریخي فرصت باید لا لاسه ورنکړل شي
خلیلزاد وايي، “موږ ټول باید کار وکړو ترڅو د سولې پر وړاندې هغه خنډونه لرې کړو چې د بین الافغاني خبرو لپاره مو کار ټکنی کوي. زه پر ټولو افغانانو غږ کوم چې هېواد ته لومړیتوب ورکړي او دا تاریخي فرصت له لاسه ورنه کړي.”
د امریکا ځانګړی استازی، زلمی خلیلزاد وايي، امریکا ژمنه ده ترڅو د بندیانو تبادلې ته زمینه برابره کړي.
خلیلزاد ویلي، “موږ له دواړو خواو ملاتړ کوو ترڅو زیات شمېر (بندیان) خوشې کړي.”
له دې سره سم د ناټو سر منشي ینس سټولټنبرګ د کرواشیا له لومړي وزیر سره په خبري کنفرانس کې ویلي، چې ناټو د افغان ځواکونو، روزنې، تجهیز او مرستې ته ژمنه او دوی له دې لارې طالبانو ته دا پیغام ورکوي، چې د جنګ په ډګر کې بریالي کیدای نه شئ او مجبور یاست، چې مذاکراتو ته غاړه کېږدئ.
سټولټنبرګ ویلي، چې دوی به په تدریجي توګه افغانستان کې د بهرنیو ځواکونو شتون راکم کړي او په خبره یې چې باید په دې کې بېړه ونه شي.
د ناټو سر منشي، د امریکا او طالبانو ترمنځ د هوکړې لاسلیک لومړی ګام بللی او زیاته کړې یې ده، چې په دې برخه کې اوږده او سخته لار په مخکې ده.
سټولټنبرګ ویلي، دوی به خپل حضور کم کړي، چې طالبان هوکړې ته ژمن پاتې شي، خو په ورته وخت کې به د افغان ځواکونو ملاتړ ته دوام ورکړي.
