Skip to content
عام خلک او سوداګر وايي،د لارو تړلو له امله له ګڼو ستونزو سره مخ دي او له طالب چارواکو غواړي،چې پاکستاني لوري سره خبرې وکړي،ترڅو تړل شوې لارې پرانیزي.
بولدک کې یو تن منتظر افغان وايي:« زموږ غوښتنه له اسلامي امارت او د هغې غاړې له حکومته دا ده، چې دغه مشکلات ژر تر ژره حل کړي.په دغو دروازو کې ډېر مشکلات دي،چې ناروغان، سپین ږیري، ماشومان او ښځې پرې اوړي او راوړي.»
اسلامي امارت وایي، د تورخم او سپین بولدک په تړاو یې پاکستاني لوري سره شته ستونزې شریکې کړي او هغوی د لارو تړلو لامل امنیتي اندېښنې بللې دي.
د اسلامي امارت د فرهنګي چارو مسوول ذبیح الله مجاهد وايي:« مکررا موږ په دې مورد باندې پاکستاني چارواکو سره خبرې وکړې. د دوی امنیتي کسان راغلي وو، کابل ته او خپلې اندېښنې یې له موږ سره شریکې کړې،چې دوی یې په دروازو کې لري. دوی یو څو مورده یادول،یو دا چې په افغاانستان کې په دې وروستیو کې زندانونه خلاص شوي دي او د دوی د تشویش وړ خلک د باندې راوتلي او هغه پاکستان ته زیان رسوي،نو ځکه یې دروازې تړلې دي،خو د اسلامي امارت له خوا ډاډ ورکړل شو،چې هېچاته به اجازه نه ورکوي،چې د افغانستان خاوره د ستاسې ضد استعمال کړي.»
اخوا د سیاسي چارو شنونکي باور لري،چې طالبان کولی شي، د لارو بېرته پرانېستو برخه کې پاکستاني لوري ته قناعت ورکړي او ټېنګار کوي،چې پاکستان ته دې ډاډ ورکړل شي،ترڅو افغان خاوره به یې پرضد ونه کارول شي.
د سیاسي چارو شنونکی محمد یاسین حبیبي وايي:« پاکستان دې تړل شوې لارې خلاصې کړي،ځکه څنګه چې د دغو دروازو ګټه افغانستان ته ده،همداسې پاکستان ته هم ده،چې زموږ صادرات لکه تازه مېوه او نور اقلام پاکستان ته ځي، له هغې زیات د پاکستان توکي افغانستان ته راځي او دا پاکستان ته ډېره ګټه ده.»
طالبان وایي، له پاکستاني پلاوي یې غوښتي دي،چې ژر تر ژره دغه مسله حل کړي، دروازې دې پرانیزي او خلکو ته دې اسانتیاوې برابرې کړي.
