افغان حکومت د سولې لپاره نړیوالې اجماع باندې عملي کار پیل کړی.
د طالبانو او امریکا د خبرو په اړه نوی پرمختګونه د اوس لپاره نه شته، خو د افغان سولې لپاره امریکایي استازی زلمی خلیل زاد په بروکسل کې د سولې په اړه په سلا مشورو او په دې اړه د مالوماتو په ورکړې بوخت دی.
د سولې وزارت وايي، په کور دننه بهرنیو سفیرانو سره لیدنې په دې موخه پیل کړي چې د سولې په اړه نړیواله او ملي اجماع غښتلې شي.
د امریکایانو او طالبانو په خبرو کې پرمختګونه هم زیات ځنډني ښکاري چې یوې بشپړې مطلوبې پایلې ته رسېدل سخت دی.
اوس په دې برخه کې د نه پرمختګ له امله د قطر خبرې سړې شوي دي خو نوې مرحله به د فشارونو وي.
له دې سره د افغانستان د بیا رغونې په چارو کې د امریکا د څار ادارې مشر بیا ګانګرس ته د مالوماتو د ورکولو پرمهال ویلي، عادي ژوند ته د ۸۰ زره طالبانو راګرځول اسانه کار نه دی.
جان سوپکو ویلي، له طالبانو سره سوله ستونزمنه ده او د سولې ساتل تر سولې لا ستونزمن کار دی.
د هغه په باور په دې اړه تر ټولو مهم د امریکا، افغانستان او نورو متحدینو ګډه همکاري او د اختلافاتو ختمول دي.
د سیګار مشر جان ساپکو داسې ویلي (( د افغانستان خلک او د افغانستان بهرني ملګري به خامخا د سولې هوکړهلیک ملاتړ کوي خو دا ډول تړون به د بیارغونې هڅو پر وړاندې نا پلان شويو ننګونو ته لار هواره کړي، هغه بیارغونه چې په تېرو ۱۸ کلونو کې د امریکا، ایتلافي ملګرو او افغان حکومت له لوري شوې ده. دا ګواښونه به افغانستان کې پانګونه زیان سره مخ کړي او د بشري او پراختیايي پروګرامونو مخه به هم ونیسي.))
په غزني کې د امریکایي الوتکې نسکورېدو چې طالبانو ویلي دوی نسکوره کړې د سولې پروسې په مخ کې یو جدي خنډ بلل کېږي.
امریکا د خپل یو عسکر د وژنې په غبرګون کې درې میاشتې خبرې ودرولې خو د خبرو بیا پیل هم له ستونزو سره مخ دی.
