د امریکا د ملي امنیت پخواني سلاکار جان بولټن په یوې مرکې کې ویلي د افغانستان د کړکېچ د هواري لپاره باید د دې هېواد اوسنی سرپرست حکومت بې واکه شي.
بولټن زياته کړې، د سرپرست حکومت له چارواکو سره د امریکايي چارواکو ناستې د امریکا پر ګټه نه دي او په خبره يې برعکس دغه کار د سرپرست حکومت پر ګټه دی او مشروعيت ورکوي.
بولټن د سرپرست حکومت د مخالفینو د تقويې لپاره، له دوی سره د هر راز مرستو او همکاريو وړانديز کړی دی.
هغه زیاته کړې: « زه فکر کوم چې د افغانستان کړکېچ لپاره اوږدمهاله حل لاره دا ده چې په واک کې بدلون راشي. زما په اند په افغانستان کې دننه د طالبانو له مخالفو ډلو سره پر پوځي او جنګي مرستو سربېره، اقتصادي برخو کې مرستې کولی شي، د مخالفینو په وده کې مرسته وکړي.»
د جان بولټن دا څرګندونې په داسې حال کې دي چې په قطر کې د اسلامي امارت د سیاسي دفتر مشر سهیل شاهین ویلي، اسلامي امارت له ترهګرۍ سره په خپلواکه توګه مبارزه کوي او په افغانستان کې یې ټولې ترهګرې او مخالفې ډلې ځپلي دي.
شاهین زیاتوي: « د ترهګرۍ پر وړاندې د اسلامي امارت هلې ځلې مستقلې او د خپل ولس او نظام د مصالحو په رڼا کې پرمخ وړل کېږي. د تېرو لسيزو د یرغلونو او میلینونو شهیدانو وروسته د افغانستان مسلمان ولس حق لري چې په امن او سوکالۍ کې ژوند وکړي. دا ټولو ته مالومه ده چې د همدې موخې لپاره اسلامي امارت هڅې کوي او په دې لاره کې لاسته راوړنې لري.»
د سیاسي چارو شنونکي وایي، امریکا د خپلو سیاسي ګټو خوندیتوب لپاره د حکومت مخالفو ډلو ته لابي او په دې توګه د اوسني حکومت په منزوي کولو سره په سيمه کې د خپلو ګټو د تحقق لپاره هلې ځلې کوي.
د سیاسي چارو شنونکی نازکمیر زیارمل وايي: « د نړۍ د قدرتونو او په ځانګړې توګه د غربي نړۍ او امریکا لپاره په سیمه کې داسې یوه افغانستان ته اړتیا لري چې د دوی په اختیار کې اوسي او د هغوی رامنځته کړی نظام اوسي، چې په سیمه کې د امریکا ګټې خوندي وساتي. که چېرته حکومت له دوی سره اړیکې او ستراتیژيک تړونونه ونه لري نو بیا باثباته افغانستان د دوی نه دی په کار او داسې یو منزوي او ناامنه افغانستان دوی غواړي چې په همدې ناامنۍ کې د سیمې په کچه خپلې ګټې تامین کړي.»
ځېنې نور بیا د ترهګرو ډلو پر وړاندې د سرپرست حکومت مبارزه بریالۍ ګڼي؛ خو وايي، پرته له نړیوالې همکارۍ دغه مبارزه دومداره کېدای نه شي.
د سیاسي چارو شنونکی ادریس محمدي ځاځی وايي: « له ترهګرۍ سره په مبارزه کې اسلامي امارت تر ډېره بریالی شوی دی؛ خو په دې هم سترګې نه شو پټولی چې اسلامي امارت د نړیوالو همکارۍ ته اړتیا لري، تر څو وکولی شي د ترهګرو پر وړاندې مبارزه نوره هم چټکه او بریالۍ کړي؛ نو د نړیوالو توجو او همکاري اړینه ده، که نړیوال په دې برخه کې اسلامي امارت یوازې پرېږدي یا ورسره همکاري ونه کړي نو بیا به اسلامي امارت یوازې په همدې سکټور کې بوخت وي او نورې برخې به ترې پاتې وي.»
دا په داسې حال کې ده، چې سرپرست حکومت په وار وار ټینګار کړی چې هېچاته د دې اجازه نه ورکوي چې د افغانستان امنیت ته ګواښ پېښ کړي او یا د افغانستان خاوره د نورو هېوادونو پر ضد وکاروي.
