Skip to content
په شمال بلخ ولایت کې د يو شمېر د موټرو پلورنځيو خاوندان وايي، په وروستيو مياشتو کې د خلکو د اقتصادي ستونزو په ډېرېدو سره د دوی کاروبار هم ټکنی شوی دی.
دوی وايي، د موټرو بیې تر۴۰ سلنې پورې راټيټ شوي؛خو بيا هم خلکو سره پيسې نه شته دی،چې موټر وپېري.
مرازشریف ښار کې د موټرو یوه پلورنځي خاوند محمد عارف وايي:« زموږ امنيت ښه دی،خو د پخوا پرتله بیو ډېر تفاوت کړی، د بېلګې په ډول که پخوا يو موټر په لس زره ډالره وو، اوس يې بیه شپږ زره ډالرو ته راټيټه شوې. ۴۰ سلنه بیې رالوېدلې دي.»
مزارشریف ښار کې د موټرو یوبل پلورنځي مسوول فخرالدين بیا وايي:« د موټرو بیې ډېرې ټيټې شوي،ځکه چې بازار نه شته دی، پيسې نه شته دی، پېرېدونکي کم دي؛نو له همدې امله بازار د پخوا پرتله رالوېدلی دی.»
احمد مشتاق د مزارشريف اوسېدونکی دی او تازه يې هوډ کړی،چې خپلې کورنۍ لپاره موټر واخلي. خو هغه له شمشاد سره په خبرو کې وويل، په تېره يوه اوونۍ کې د ډالرو پر وړاندې د افغانۍ د رالوېدو له امله يې د موټر اخېستو لپاره چمتو کړې پيسې بسنه نه کوي.
مشتاق زیاته کړه:« په اوس وخت کې د موټرو اخېستل ډېر ستونزمن شوي،ځکه چې بیې په ډالرو دي او ډالر هم په بیساري ډول لوړ شوی دی، د يوه کور لپاره يو موټر اړين وي، ما هم وغوښتل،چې موټر واخلم،خو چې بازار ته راغلم، بیې مې وليدې، فکر کوم پيسې مې کمېږي.»
د کاروبار نخ شتون، د تنخواوو ځنډېدل او د ډالرو پر وړاندې د افغانۍ د ارزښت کمېدل مزارشريف کې د موټرو د پېر او پلور د ټکني کېدو لاملونه يادېږي.
مزار شریف ښار کې د موټرو پلورنځي خاوند ګلرحمان وايي:« له اسلامي امارته زموږ غوښتنه دا ده،چې د اقتصاد د پښو درلو برخه کې ډېر کوشش وکړي. موږ ډېر خوشاله يو،چې امنيت ښه شوی، د دې تر څنګ چې اقتصاد هم ښه شي،نو خلک به په ارامه زړه خپل ژوند وکړي.»
په ورته مهال د مزارشريف اوسېدونکي او سوداګر د ډاډمن امنيتي وضعيت له رامنځته کېدو خوشاله دي او له حکومته غواړي،چې د شته اقتصادي ستونزو د حل لپاره دې جدي هڅې وکړي.
