باجوه وايي،افغانستان ته باید ټولې مرستې پروخت ورسیږي، پرموقع وویشل شي او پرته له دې به د افغانانو وضیعت نور هم خراب شي .
باجوه زیاته کړې،که د افغانستان اوسنی بشري وضیعت له پامه وغورځول شي،نه یوازې دا چې دکډوالۍ کړکیچ به پراخ کړي،بلکې دغه هېواد به یو ځل بیا د ترهګرۍ پر ځاله بدل شي.
د باجوه په خبره، که افغانستان له داسې یوه حالت سره مخ شي،نو د داعش ډلې لمن به هم پراخه شي او د سپټمبر یولسمې پر شان د خطرناکو بریدونو ترسره کولو توان به پیدا کړي.
هغه زیاتوي:« دا زموږ د ټولو دنده ده،چې افغانستان ته په موقع سره د مرستو د لیږد ډاډ ترلاسه کړو. افغانستان کې بشري وضعیت ته رسیدنه نه کول، یوازې د کډوالۍ د کړکیچ لامل کیږي، بلکې، افغانستان به یو ځل بیا د ترهګرۍ پر ځاله بدل کړي او دا ځل به داعش ډله وکړای شي،چې د سپټمبر تر ۱۱مې خطرناک بریدونه وکړي.»
دوی وايي،که پاکستان رښتیا هم له افغانانو سره خواخوږي لري،نو د افغانستان نوی نظام دې پر رسمیت وپیژني،چې نورو هېوادونو ته هم لاره اواره شي،چې ورسره په افغانستان کې د بشري ناورین مخه ونیول شي .
د پوځي چارو کارپوه سرور نیازی وايي:« دې کې هیڅ شک نه شته دی،چې لوږه،بیکاري او بې روزګاري د تروریزم زیږنده کیدای شي ، که چیرې باجوه او نور پاکستاني چارواکي د افغانستان په فکر کې وي،نو باید د افغانستان نوی حکومت یې پر رسمیت پیژندلی وای،چې نورو هېوادونو هم ورته زړه ښه کړی وای، له داسې څرګندونو سره دوی غواړي،چې افغانستان کې د افغانانو ذهنونه مخشوش کړي او خپلو موخو ته ورسیږي.»
د اسلام اباد امنیتي فورم ناستې ته د افغان سولې لپاره د امریکا متحده ایالتو بهرنیو چارو وزارت پخوانی ځانګړی زلمی خلیل زاد هم ورغلی و او د پاکستان له ټولو ملکي او نظامي چارواکو سره یې جلا جلا لیدنې هم درلودې.
کتوونکي په دې باور دي،چې پاکستان د امریکا متحده ایالتو د استخباراتي پروژو د پلي کولو لپاره په سیمه کې تر ټولو غوره هېواد دی او امریکا هم پرې حساب کړی دی.
د افغانستان اسلاميامارت د جنرال قمرجاوید باجوه د څرګندونو په تړاو تر اوسه پورې غبرګون نه دی ښودلی.
