امیري: د نجونو ښوونځيو پرانېستلو په اړه د اسلامي امارت مشرانو ترمنځ اختلافات پیدا شوي

د افغان ښځو او بشر حقونو لپاره د امریکا متحده ایالتو ځانګړې استازې رینا امیري وایي،د نجونو ښوونځیو پرانیستلو په تړاو د اسلامي امارت د مشرانو ترمنځ اختلافات پیدا شوي دي.

امیري د ترکیې له ټي.آر.ټي ټلوېزیون سره په مرکه کې ویلي، د نړیوالو شرطونو له پوره کولو پرته به پر اسلامي امارت لګېدلي بندیزونه کم نه شي او پر رسمیت به ونه پېژندل شي.

خو  د پوهنې وزارت د اسلامي امارت د چارواکو ترمنځ د نجونو د ښوونځیو په تړاو د اختلافاتو خبره رد کړې ده.

پوهنې وزارت وایي، دوی د ټولو ښوونځیو پرانېستلو ته بشپړ چمتووالی لري او د مشرتابه له امر سره سم به په هېواد کې د نجونو ټول ښوونځي پرانیزي.

ورته مهال د افغانستان لپاره د امریکا ځانګړي استازي ټوماس وېسټ په یوه ټویټ کې ویلي، له پخواني ولسمشر حامد کرزي سره یې د نجونو د ښوونځیو پر ژر پرانېستل کېدو او د افغانستان د راتلونکې د ټاکلو لپاره د یوه ملي مشورتي بهیر پر اړتیا خبرې کړې دي.