اقتصادي چارو پوه نورالله عزیز وايي:« که چېرته د مصرف لړۍ د افغانستان د داخلي مالي نظام سیستم په مرسته ترسره شي،د افغانستان په داخلي مارکېټ کې باوري یم،چې دغه ۲۸۰ میلیونه ډالر به د افغانستان د مالي نظام په بیارغونه کې تر یو بریده رول ولوبوي.»
له ملګرو ملتونو سربېره د نړۍ یو شمېر هېوادونو او نړیوال بانک د افغانستان بشري ناورین مهار لپاره د ملیاردونو ډالرو بشري مرستې اعلان کړي،خو کمه اندازه یې افغانستان ته رواړل شوي او پر اړمنو وېشل شوې دي.
اقتصاد پوهان وایي، مرسته کېدونکې پیسې دې لومړی د افغانستان په مالي نظام کې جذب او بیا دې د خصوصي بانوکونو له خوا د افغانستان په داخلي مارکیټ کې مصرف شي،چې په دې سره به وکولی شي،تر یو بریده د افغانستان مالي نظام پیاوړی کړي، خو که په پاکستان یا نورو هېوادونو کې پرې اجناس واخېستل شي،بیا به یې ګټه زیاته نه وي.
اقتصاد پوه نورالله عزیز وايي:« اړینه ده،چې نورې مرستې هم ترسره شي،ځکه یوازې دغه مرسته ستونزې نه شي حل کولی،خو بیا هم که د مصرف لړۍ یې په داخل کې وي مالي نظام تر یوه بریده پیاوړی کولی شي.»
دوی وایي، که دغه مرستې د تیر په څېر په درېیم هیواد کې مصرف شي، د افغانستان په مالي نظام اغیز نه شي کولی.
ومو غوښتل،د افغانستان بانک نظر هم ولرو،خو د مکررو اړیکو سره سره یې په دې تړاو نظر شریک نه کړ.
