Skip to content
نن د اګسټ ۳۱ مه افغانستان کې د بهرنیو ځواکونو نظامي حضور پای ته ورسېد او افغانستان په بشپړه توګه د طالبانو تر واک لاندې شو.
پرون شپه ټول امریکايي ځواکونه له افغانستان ووتل او امریکا شل کلنه جګړه ظاهراً پای ته ورسوله.
په دې سره افغانستان کې د امریکا شل کلن ماموریت پای ته ورسېد، چې طالبان یې اشغال بولي.
د امریکا دفاع وزارت یا پنتاګون ویلي، له افغانستانه یې خپل ټول ځواکونه وایستل.
طالبانو تېره شپه له امریکا د خپلواکۍ د بېرته اخیستلو په خوشحالۍ کې هوایي ډزې هم وکړې، چې خلکو ته یې اندېښنې هم پیدا کړې.
امریکا ویلي، په افغانستان کې یې د شلن کلن ماموریت د پای سره سم نوی فصل پیل شو.
د امریکا د بهرنیو چارو وزیر انتوني بلینکن ویلي، د افغانستان په تړاو یې نوی فصل پیل شو، چې سر له ننه په افغانستان کې خپل سیاسي حضور وځنډاوه او دیپلوماتان یې قطر ته ولېږدول.
انتوني بلینکن ویلي، اوس باید طالبان خپلې کړې ژمنې عملي کړي، چې سیاسي مشروعیت او ملاتړ ترلاسه کړي.
بلینکن ویلي، له دې وروسته افغانستان سره د دیپلوماسۍ له مخې چلند کوي، خو طالبانو ته یې وریاده کړې، چې خپلې ژمنې پوره کړي او خلکو ته د سفر کولو ازادي ورکړي، د مېرمنو او اقلیتونو حقونو ته درناوی وکړي او پرې نږدي، چې دا هېواد یو ځل بیا د ترهګرو په خوندي ځای بدل شي.
