د اروپايي ټولنې د پناه غوښتنې ادارې د افغانستان وضعیت په اړه ګډ تحلیلي لارښود خپور کړی دی.
په دغه لارښود چې د اروپايي ټولنې د ۲۷ غړو هېوادونو لخوا په متفقه توګه تائید شوی، په کې ویل شوي چې افغانې ښځې، نجونې او نورې زیان منونکې ډلې په افغانستان کې د ځورونې له ګواښ سره مخ دي.
په راپور کې راغلي، چې د اروپايي ټولنې عدالت محکمې، په سیمه کې مالوماتي منابع او د دې ټولنې غړیو هېوادونو ویلي، د ښځو او نجونو بشري حقونه نقض شوي او دغه برخه د ځورونو له ګواښ سره مخ ده.
د راپور یوه برخه:« د اروپايي ټولنې ۲۷غړیو هېوادونو دا تائید کړه چې په افغانستان کې ښځې، نجونې او نور د تاوتریخوالي سره مخ ډلې د ځورونو له ګواښ سره مخ دي. د اروپايي ټولنې عدالت محکمې، په سیمه کې مالوماتي منابعو او د دې ټولنې غړیو هېوادونو د مالوماتو پر بنسټ په افغانستان کې واکمنو چارواکو د ښځو او نجونو بشري حقونه او ازادي منع کړې او دغه برخه د ځورونو له ګواښ سره لاهم پر خپل ځای پاتې ده.»
همدا راز په راپور کې راغلي، چې د ۲۰۲۴ کال موندنو ښودلې، چې له بهرنیو ځواکونو سره د افغان کارکوونکو، د دولت ضد ډلو او د قومي او مذهبي لږکیو د ژوند خوندیتوب د نورو موخو ترڅنګ مهمه اړتیا ده.
د راپور یوه برخه:« د ۲۰۲۴ کال موندنې تائیدوي چې له طالبانو څخه د پخواني حکومت چارواکو، له بهرنیو ځواکونو سره افغان کارکوونکو، د طالبانو ضد ډلو، د بشري حقونو د مدافعینو او نورو قومي اومذهبي لږکیو د ژوند خوندیتوب د نورو موخو تر څنګ مهمه اړتیا ده.»
د اسلامي امارت ویاند بیا وایي، د دې راپور ټولې برخې د بهرنیو چارو وزارت څېړي او خپل نظر به پر خپل وخت سره شریک کړي.
خو د سیاسي چارو شنونکي وايي، د سرپرست حکومت له لوري د ښځو پر کار او د نجونو پر زدهکړو بندیزونه هغه ننګونې دي، چې ډېری کورنۍ یې د هېواد پرېښودو ته اړې کېږي.
دوی له سرپرست حکومت غواړي چې د ښځو کار او له شپږم ټولګي پورته د نجونو پر مخ د زدهکړو دروازې پرانیزي؛ څو د نړۍوالو له لوري پر سرپرست حکومت د فشار راوړلو ته بهانه پاتې نهشي او رسمیت پېژندنې ته لاره هواره شي.
اروپايي ټولنې د پناه غوښتنې ادارې سربېره له دې وړاندې د ملګرو ملتونو د بشري حقونو سازمان، د بښنې نړۍوال سازمان او یو شمېر نورو نړۍوالو بنسټونو په هېواد کې د ښځو پر کار او او له شپږم ټولګي پورته پر زده کړ بندیز اندېښنه ښودلې او له سرپرست حکومته یې په ځلونو غوښتنه کړې چې د ښځو او نجونو حقونو ته جدي پاملرنه وکړي.
خو اسلامي امارت بیا له دې وړاندې په ځلونو ویلي، د اسلامي او شرعي اصولو په چوکاټ کې د ښځو ټول حقونه خوندي دي او د نجونو زدهکړو لپاره په ځانګړي پلان کار کوي.
