Skip to content
اروپايي ټولنه وايي، له طالبانو سره به یې اړیکې د شرطونو پر اساس وي او که خپلې کړې ژمنې عملي کړي، اړیکې ورسره پالي.
له ترهګرو ډلو سره د اړیکو پرې کول، بیان ازادۍ او د ښځو حقونو ته ژمنتیا د نړیوالو مهم شرطونه دي.
اروپايي ټولنې د بهرنۍ پالیسۍ مسوول جوزیپ بورېل وايي: «موږ به د هغوی د راتلونکي چلند په اړه پریکړه وکړو. موږ به وګورو چې راتلونکی افغان حکومت څومره افغانستان ته ژمن دی او څومره ډاډ راکولای شي، چې د نورو هېوادونو د ترهګرۍ صادرکوونکی هېواد نه شي. بل دا چې دوی ټولو بشري او د ښځو حقونو ته پاملرنه وکړي.»
بورېل همدا راز افغانستان کې د بیان ازادۍ پر ساتلو ټېنګار وکړ او د رسنیو فعالیت یې د خپلو شرطونو په کتار کې راوستی دی.
اخوا د امریکا متحده ایالتو هم ټیېګار کړی، هغه مهال به له طالبانو سره ډیپلوماټیکې اړیکې وساتي، چې هغوی کړې ژمنې عملي کړي.
د سپینې ماڼۍ د مطبوعاتو مرستیاله جېن ساکي وايي: «موږ غواړو،چې دا ډېر په وضاحت سره ووایو. موږ د طالبانو پر خبرو نه بلکې د هغوی پر اعمالو قضاوت کوو. موږ له نړیوالې ټولنې سره له نږدې کار کوو، چې ګام په ګام له افغانستان سره ګډه همکاري وکړو. زموږ بشري مرستې او نورې هر ډول مرستې په دې مشروطې دي چې موږ پر هغوی ډاډمن شو.»
بل پلو چین بیا په افغانستان کې له راتلونکي حکومت سره د اړیکو لپاره د اوږد مهاله سولې او امنیت شرط ایښی دی.
د چین بهرنیو چارو وزارت ویاند وانګ وېنبین وايي: «موږ هېله لرو چې په افغانستان کې وضعیت بېرته نورمال شي. که طالبان له نړیوالو سره ښې اړیکې پالل غواړي، باید د ټیکاو او دوامداره امنیت ساتلو لپاره هڅې زیاتې کړي.»
دغه هېوادونه داسې مهال له افغانستان سره خپلې راتلونکې اړیکې تر شرطونو محدودوي، چې د طالبانو د سیاسي رهبرۍ غړو په دوحه کې له هند سربېره د یو شمېر هېوادونو استازو سره جلا لېدنې کړي دي.
ویل کېږي چې د اسلامي امارات د یوه منظم حکومت نه اعلان هم د دې لامل شوی دی، چې نړۍ ورسره د ډیپلوماټيکو اړیکو په تړاو څرګنده دریځ ونه لري.
