اروزګان کې ۴۵۰۰  بې ځایه شوې کورنۍ بېرته خپلو سېمو ته ستنې شوې

اروزګان ولایت کې د کډوالو او بېرته راستنېدونکو چارو ادارې چارسمبالی نور آغا حیدري  وايي، د جګړې په پای ته رسېدو سره، شااوخوا ۴۵۰۰ کورنۍ بېرته خپلو پخوانيو مېنو ته ستنې شوي دي.

حیدري زیاته کړه:« زموږ د شمېرو له مخې ۴۵۰۰ کورنۍ بېرته خپلو سېمو ته رسېدلي دي، دوی د جګړې او کمربندونو تر ماتېدو وروسته په ډېرې خوښۍ سره خپلو سيمو ته تللي دي. دوی له تېرو پنځه یا څلورو کلونو راهیسې د جګړو له امله بېځایه شوې وې.»

دې کورنیو د تېرو جګړو له امله خپلې مېنې پرېيښې  وې او دلته مرکز ترینکوټ کې د غربت شپې او ورځې یې سبا کولې. 

اخوا بیا د کډوالو او بېرته راستنېدونکو  چارو ادارې مخې ته سلګونه کسان راټول شوي دي او نيوکه یې داده، چې له بېځایه شویو او غربت ځپلو سره د مرستو په روانه لړۍ کې له دوی سره توپیریز چلن کېږي.

دوی ادعا کوي،چې په دغو مرستو کې شفافیت نه شته دی او یوازې هغو کسانو ته مرستې رسېږي، چې د چارواکو واسطه له ځان سره ولري.

د یوې بې ځایه شوې کورنۍ غړی وايي:« دلته هره ورځ د مرستې لپاره راځو، خو بېرته تش لاس ستنېږو. دلته یوازې هغو کسانو ته مرستې رسېږي،چې له چارواکو سره تړاو، یا واسطه ولري.»

خو د کډوالو چارو ادارې چارسمبالی نور آغا حیدري د غربت ځپلو کسانو دا ادعاوې ردوي او وايي، له بې وزلو کورنیو سره د مرستو لړۍ یې د همکاره موسسو پر مټ پیل کړې او تر دا مهاله یې تر ۱۰۰۰ له زیاتو کورنیو سره د خوراکي توکو او نغدو پيسو مرستې کړي دي.

حیدري زیاته کړه:« موږ د ټولو همکارو موسسو مسوولین دلته د کډوالو ریاست ته راوغوښتل. له دوی مو غوښتنه وکړه،چې له غربت ځپلو کورنیو سره مرستې وکړي، د موسساتو مسوولینو له  موږ سره ژمنه وکړه، چې د مرستو لړۍ به پيل کوي. اوس هماغه د مرستو لړۍ پيل شوې او اوس هم دوام لري.»

اروزګان کې بېځایه شوي او غربت ځپلې کورنۍ پر داسې مهال د مرستو د زیاتېدو غوښتنه کوي،چې د ملګرو ملتونو د پراختیا پروګرام په ورستي راپور کې له اقتصادي بحران سره، د افغانانو د مخکېدو په اړه اندېښنه ښودل شوې وه.