Skip to content
که څه هم د افغانستان د بشري او اقتصادي ناورین په تړاو نړیوال وخت ناوخت خپلې اندېښنې شریک کوي او کله هم د سقوط ګواښونه کیږي،خو نړیوال بانک په خپل تازه راپور کې د افغانستان اقتصادي وضعیت خورا ثابت یاد کړی دی.
دغه راپور چې د تېر ۲۰۲۲ زېږدیز کال وروستۍ نهه میاشتو ته یې کتنه کړې، په کې ویل شوي،چې بهر ته د افغانستان په صادراتو کې د ۲۰۲۰ او ۲۰۲۱ کلونو په پرتله د ۸۰۰ میلیونو ډالرو زیاتوالی راغلی دی.
د نړیوال بانک د راپور یوه برخه:« افغانستان د تېر ۲۰۲۲ کال په لومړیو لسو میاشتو کې د یو اعشاریه ۷ میلیارده ډالرو صادرات کړي،په داسې حال کې چې دا کچه ۲۰۲۱ کال کې صفر اعشاریه نهه میلیارده ډالره وه. پاکستان له ۶۵ سلنې او هند له ۲۰ سلنې سره د افغانستان صادراتو تر ټولو ستر مارکېټونه وو. په صادر شویو توکو کې، ۶۵ سلنه سبزي، ۲۸ سلنه منرالونه او لس سلنه نساجي تولیدات شامل دي.»
په راپور کې ویل شوي،چې افغانستان په دې موده کې ۲.۹ میلیارده ډالرو په ارزښت واردات کړي،چې ۲۳ سلنه یې له ایران، ۱۶ سلنه یې له پاکستان، ۱۴ سلنه یې له چین وو، چې تر ټولو ډېر واردات د سبزیو برخه کې وو.
دغه راز په راپور کې د افغانستان بانکي سیسټم په اړه ویلي، د پیسو د ورکړې برخه کې لا هم ستونزې پر ځای دي، خو یادونه کوي،چې افغانۍ تر ډېره خپل ثبات ساتلی دی.
د نړیوال بانک د راپور یوه برخه:« د ۲۰۲۲ کال په لومړیو نهو میاشتو کې د افغانۍ ارزښت ثابت پاتې شوی دی. افغانۍ د امریکایي ډالرو پر وړاندې یو نیم سلنه او د یورو پر وړاندې یو اعشاریه ۲ سلنه راټیټه شوې وه، خو د پاکستانۍ کلدارو پر وړاندې ۲۴ اعشاریه ۸ سلنه او د هندۍ کلدارې پر وړاندې ۲ اعشاریه ۶ سلنه پورته تللې وه.»
په دې راپور کې د افغانستان داخلي عوایدو په اړه ویل شوي،چې د ۲۰۲۰ او ۲۰۲۱ کلونو سره یې کچه مساوي ده، خو له حکومتي ادارو د عوایدو راټولولو برخه کې ۱۰ سلنه زیاتوالی تر سترګو کیږي.
له حکومتي ادارو ډېر عواید د ډبرو سکرو له درکه راټول شوي دي.
د راپور یوه برخه:« د ۲۰۲۲ کال په لومړیو نهو میاشتو کې د عوایدو راټولولو پروسه پیاوړې وه او افغانستان کې د ۲۰۲۲ کال مارچ څخه تر ډیسمبر میاشت پورې ټول د یو اعشاریه ۵۴ میلیارده ډالرو عواید راټول شوي دي، چې دا شمېره د ۲۰۲۱ او ۲۰۲۰ سره مساوي ده. ۵۸ سلنه عواید د افغانستان په پولو کې راټول شوي دي. په یادو میاشتو کې د افغانستان له داخلي سرچینو راټول شوي عواید صفر اعشاریه ۷ میلیارده ډالرو ته رسیږي،چې ډېره برخه یې له حکومتي ادارو یا غیر مالیاتي سرچینو دي.»
د نړېوال بانک سروي ښیي،چې د حکومتي کارکوونکو معاشونه په وخت ورکول کیږي.
په دې برخه کې د سروې ۹۷ سلنه ګډونوالو مثبت ځوابونه ورکړي او دا یې هم ویلي،چې د سړیو پرتله ښځینه کارکوونکو ته پر وخت معاشونه ورکول کیږي،خو بانکونو کې د نغدو پیسو نشتون لویه ستونزه یادوي.
له دې مخکې د ملګرو ملتونو بشري مرستو همغږۍ ادارې (اوچا) ویلي ول، چې د افغانستان بشري ناورین دې کچې ته رسېدلی دی،چې ښایي افغانستان له سیسټماټیک سقوط سره مخ شي.
