لانا نسبیه: له ا.ا غواړو چې پر افغان ښځو لګیدلي بندیزونه لرې کړي 

په ملګرو ملتونو کې د متحده عرب امارتو دایمي استازې لانا نسبیې په افغانستان کې د ښځو او نجونو روان وضعیت ښکاره جنسیتي بېلوالی یاد کړی دی.

لانا چې د ښځو مشرۍ په اړه د ملګرو ملتونو امنیت شورا ځانګړې کلنۍ غونډې ته وینا کوله وویل، دا هیڅ د منلو نه ده،چې د یوه کال په تېرېدو سره نجونې لا هم په افغانستان کې ښوونځیو ته نه ځي.

هغې زیاته کړه:« پوره ۴۰۰ ورځې کیږي،چې په افغانستان کې نجونې منځنیو ښوونځیو او لیسو ته نه پرښودل کیږي. د نجونو ښوونځیو بندولو ته هېڅ توجیه نشته دی. متحده عرب اماراتو ته دا او د افغان ښځو پر وړاندې نور محدودیتونه د منلو وړ نه دي. له ټولنیز او عام ژوند د افغان ښځو جلا کول،د دې بېلګه ده،چې د ښځو پر وړاندې لا هم ډول ډول تاوتریخوالی روان دی.»

نسبیې سټیج ټینګار کړی،چې د ښځو د ځواکمنولو شعار دې بس شي او ښځو ته دې په واقعي مانا ځواک ورکړل شي.

دغه راز نسبیې د افغان ښځو هڅې ستایلي،چې په داسې شرایطو کې یې خپلې هڅې نه دي پریښي او په انلاین ډول نجونې زده کړو ته هڅوي.

هغې زیاته کړه:« له روان تاوتریخوالي سربېره نجونې هڅې کوي،چې خپلو زده کړو ته په افغانستان کې دوام ورکړي. هغو په انلاین ډول خپلو زده کړو ته دوام ورکوي. موږ کولی شو،ښځې له انلاین ژوند راوباسو او موږ د دې وړتیا لرو. که موږ دا ومنو،دا ښکاره جنسیتي بېلوالی دی.»

افغانستان کې د نجونو منځنیو ښوونځیو او لیسو د بیا پرانیستې لپاره داسې مهال پر نړیواله کچه لابي کیږي،چې اسلامي امارت وایي دوی د نجونو لپاره پر جلا درس خونو او ځانګړي ټرانسپورټ کار کوي.

له نړیوالو او عامو افغانانو سربېره پر اسلامي امارت کې دننه هم داسې کړۍ شته دي،چې نور له ځنډ پرته د نجونو ښوونځیو پرانېستل غواړي.