Skip to content
د پکتیا ولایت کار او ټولنیزو چارو ریاست مشر محمد رحیم نصرت وایي، دغه ولایت کې د سوالګرو او هغو ماشومانو د کره شمېر مالومولو په موخه یې سروې پیل کړې،چې درانه کارونه ترسره کوي.
نصرت وایي، یو شمیر کسان سوال د اړتیا له مخې کوي، خو ځینې نور یې له بېلابېلو جرمي کړیو سره په اړیکه کې دي او باید مخه یې ونیول شي.
نصرت زیاته کړه:« هغه سوالګر،چې مستحق دي او هغه چې حرفوي دي، د هغوی تشخیص باید وشي. هغه جرمي کړۍ،چې غواړي، د سوالګرو له لارې خپلو موخو ته ځان ورسېږي، نو زموږ هدف دا دی،چې مخنیوی یې وشي.»
اخوا بیا دغه ولایت کې د هغو ماشومانو شمېر ورځ بلې په ډېریدو دی،چې د کورنیو اړتیاوو پوره کولو لپاره باید دارنه کارونه ترسره کړي .
یو شمیر ماشومانو د کار له امله د کورنیو په خوښه زده کړې پریښې او ځېنې داسې هم شته دي، چې د زده کړو تر څنګ نیمه ورځ کار کوي.
یوتن کاریګر ماشوم وايي:« ښوونځي ته ځم، په پنځم ټولګي کې یم. ۱۴ کاله عمر لرم. دلته څلور کاله کېږي،چې کار کوم، د اوونۍ ۲۵۰ افغانۍ راکوي.»
یو بل کاریګر ماشوم بیا وايي:« دلته شااوخوا شپږ میاشتې کېږي، چې کار کوم، مخکې ښوونځي ته تللم،خو اوس مې پرېښی دی. په نهم ټولګي کې مې ښوونځي پرېښود.»
د کار او ټولنیزو چارو ریاست وایي، له مرستندویه بنسټونو سره په اړیکه کې دي او د سروې له بشپړیدو وروسته به ماشومانو ته د زده کړو زمېنه برابره او مستحقو سوالګرو ته به میاشتنۍ پیسې ورکول کېږي.
