Skip to content
د ترکیې دیار باقر ښار سږ کال د دیني علماوو اوومې ناستې کوربه دی،چې د افغانستان په ګډون له ۸ اسلامي هېوادونو استازي وربلل شوي دي.
له افغانستانه د اسلامي امارت په استازیتوب په سږنۍ ناسته کې د اسلامي امارت ویاند ذبیح الله مجاهد وینا وکړه او ویې ویل، د نجونو ښوونځیو بیا پرانېستل حتمي دي.
مجاهد زیاته کړه:« د ټولو نجونو پرمخ د ښوونځيو خلاصېدل حتمي دي او موږ هغوی ته د نصاب په سمونې،د تګ راتګ لپاره د ترانسپورټي وسایلو په چمتو کولو او د جلا ښوونیز سیستم په جوړولو بوخت یو، ترڅو د ولسونو ذهن د نجونو زدهکړو ته برابر شي.»
مجاهد که څه هم ناسته کې خپله وینا د افغانستان په ازادۍ او بیارغونه کې د علماوو پر ونډې پیل کړه،خو ترڅنګ یې د هېواد ښوونیز نظام بل کلیدي بحث وه.
مجاهد وايي،اوس لسګونه زره هلکان او نجونې د هېواد په ۱۴۰ حکومتي او خصوصي پوهنتونونو کې لوړې زده کړې کوي.
هغه زیاته کړه:« تیره اداره کې د افغانستان ۷۰ سلنه خلک له زده کړو بې برخې وو، خو اوس د زده کړو کچه ټول هېواد ته رسیدلې او دا مهال د هېواد په ۱۴۰ پوهنتونونو کې په لسګونو زرو نجونې پر زدکړو بوختې دي.»
په دغه دوه ورځنۍ ناسته کې،چې د ترکیې، افغانستان، ایران، عراق، اردن، لبنان، سوریې او لیبیا استازو ګډون کړی وه، اجنډا یې د اسلامي امت پر بدلون او بیارغونه کې د علماوو ونډه ده.
د اسلامي علماوو سږنۍ ناسته اوومه هغه ده،چې هر کال یو ځل ترسره کیږي.
